ٹریفک روانی برقرار رکھنے کیلئے نفری کی کمی حائل’ 87 ہزارکلومیٹر شاہراہوں کیلئے صرف 12 ہزار اہلکار تعینات

لاہور (کرائم رپورٹر) ٹریفک روانی برقرار رکھنے کیلئے نفری کی کمی، پنجاب میں2 کروڑ70 لاکھ گاڑیوں کے لیے87 ہزارکلومیٹر شاہراہوں کیلئےصرف ساڑھے12 ہزار ٹریفک اہلکار تعینات، ٹریفک پولیس پنجاب کو2,206 اہلکاروں کی کمی کا سامنا، مراسلے نے ٹریفک روانی میں بندش کا بھانڈا پھوڑ دیا۔ ٹریفک ذرائع کے مطابق ٹریفک پولیس میں تعینات2,631 اہلکار غیر تربیت یافتہ ہیں جو کہ ضلعی پولیس کے ایگزیکٹو کیڈر سے آئے ہوئے ہیں۔ مراسلے میں6 بڑے شہروں میں اے ایس آئی رینک کے جونیئر ٹریفک وارڈن کی169 آسامیاں خالی ہیں جن پر فوری بھرتی کیے جانے کی سفارش کی گئی۔20 اضلاع میں 67 جونیئر ٹریفک وارڈنز کی پی پی ایس سی کے ذریعے فوری بھرتی کی جائے۔ ٹریفک اسسٹنٹ کی 1850 خالی آسامیوں پر نئی بھرتی کی جائے۔ ٹریفک اسسٹنٹ کی بھرتی دو مرحلوں میں ہوگی، 900 بھرتیاں سال2026-27 میں اور 950 بھرتیاں2027-28 میں کی جائیں۔ ٹریفک پولیس میں مخصوص بھرتیاں کی جائیں تاکہ بہتر طریقے سے ٹریفک روانی برقرار رکھی جاسکے۔ ڈی آئی جی ٹریفک پنجاب وقاص نذیر نے خالی سیٹوں پر بھرتیوں کیلئے مراسلہ آئی جی پنجاب کو بھجوادیا۔