نادرا نے پاسا آئی سی ٹی ایوارڈز میں تین اعزازات جیت لئے

لاہور (این این آئی)نادرا نے پاکستان سافٹ ویئر ہایوسز ایسوسی ایشن کے انفارمیشن و کمیونیکیشن ٹیکنالوجی ایوارڈز 2026ء میں تین اعزازات حاصل کیے ہیں۔ یہ اعزازات نادرا کی ان ڈیجیٹل خدمات کے اعتراف میں دیئے گئے جن سے شہریوں کے لیے شناخت، تصدیق اور عوامی خدمات تک رسائی مزید آسان ہوئی ہے۔نادرا کی پاک آئی ڈی موبائل ایپ نے حکومتی و شہری خدمات کے شعبے میں ایوارڈ حاصل کیا۔ 22ملین سے زائد ڈائون لوڈز کے ساتھ پاک آئی ڈی اب محض موبائل شناختی ایپ تک محدود نہیں رہی بلکہ ایک وسیع ڈیجیٹل پلیٹ فارم بن چکی ہے، جس کے ذریعے پاکستان اور بیرونِ ملک مقیم شہری شناخت اور اس سے متعلق بڑھتی ہوئی خدمات تک رسائی حاصل کر سکتے ہیں۔ملٹی بائیومیٹرک ویریفکیشن سسٹم کو کمیونٹی اور دور دراز علاقوں کی خدمات کے شعبے میں ایوارڈ دیا گیا۔ یہ نظام چہرے کی شناخت سمیت متعدد بائیومیٹرک طریقوں سے تصدیق کی سہولت فراہم کرتا ہے۔ جہاں انگلیوں کے نشانات واضح طور پر حاصل نہ ہو سکیں یا قابلِ اعتماد طور پر میچ نہ ہوں، وہاں یہ متبادل ذرائع سے شناخت کی تصدیق ممکن بناتا ہے، خصوصاً ان شہریوں کے لیے جنہیں روایتی بایومیٹرک تصدیق میں دشواری پیش آتی ہے۔