لاہور (جنرل رپورٹر)پنجاب کے سرکاری سکولوں میں طلبہ کے لیے روزانہ 10 منٹ کے کوئیک ٹیسٹ لازمی قرار دے دیے گئے ہیں۔ ذرائع کے مطابق سرکاری سکولوں میں طلبہ کا ماہانہ جامع اسیسمنٹ بھی لازم قرار دیا گیا ہے، جبکہ روزانہ کوئیک ٹیسٹ اور ماہانہ اسیسمنٹ کے نتائج کا باقاعدہ ریکارڈ رکھنے کی ہدایت کی گئی ہے۔ہر طالب علم کے ماہانہ ٹیسٹ اور سکول بیسڈ اسیسمنٹ کے نمبر پورٹل پر درج کیے جائیں گے، جبکہ طلبہ کی تعلیمی کارکردگی کے ریکارڈ کی افسران کے دوروں کے دوران پڑتال بھی کی جائے گی۔ چیف ایگزیکٹو افسران کو ہدایت کی گئی ہے کہ وہ سکولوں میں روزانہ کوئیک ٹیسٹ اور ماہانہ اسیسمنٹ پر عملدرآمد یقینی بنائیں۔حکام کے مطابق ماہانہ اسیسمنٹ کے ذریعے طلبہ کی تعلیمی کمزوریوں کی نشاندہی کی جائے گی، جبکہ سیکرٹری سکول ایجوکیشن کے دوروں کے دوران اسیسمنٹ رجسٹر کا خصوصی جائزہ بھی لیا جائے گا۔
