پاکستان کی معاشی شرح نمو 3.7 فیصد ہوگئی، نجی سرمایہ کاری میں 8.6 فیصد اضافہ

کراچی(این این آئی)ایشیائی ترقیاتی بینک (اے ڈی بی) نے کہا ہے کہ پاکستان کی معاشی شرح نمو گزشتہ مالی سال کے دوران 3.2 فیصد سے بڑھ کر 3.7 فیصد ہوگئی، جبکہ شرح سود میں کمی اور بہتر کاروباری اعتماد کے باعث نجی سرمایہ کاری میں 8.6 فیصد اضافہ ہوا، تاہم مہنگی توانائی، بیرونی غیر یقینی صورتحال، عالمی مالیاتی حالات اور موسمیاتی خطرات معاشی نمو کے لیے چیلنج برقرار ہیں۔اے ڈی بی کی رپورٹ کے مطابق مالی سال 2026 میں پاکستان کی معاشی نمو میں خدمات، مینوفیکچرنگ، زراعت اور نجی سرمایہ کاری نے اہم کردار ادا کیا۔ سیلابی نقصانات کے باوجود زرعی شعبے کی شرح نمو 2.9 فیصد رہی، جبکہ مینوفیکچرنگ اور خدمات کے شعبوں میں توسیع نے مجموعی معاشی سرگرمیوں کو تقویت دی۔