لاہور (جنرل رپورٹر)بورڈ آف انٹرمیڈیٹ اینڈ سیکنڈری ایجوکیشن لاہور نے انٹرمیڈیٹ (پارٹ ٹو)کے سالانہ امتحانات کے نتائج اور پوزیشنز کا باضابطہ اعلان کر دیا ہے۔ جاری کردہ نتائج کے مطابق امتحانات میں کامیابی کا تناسب 64.98 فیصد رہا۔ امتحانات میں 1لاکھ 92ہزار 950امیدواروں نے حصہ لیا اس سلسلہ میں منعقد ہونے والی پروقار تقریب میں وزیرِ تعلیم پنجاب رانا سکندر حیات، چیئرمین ٹاسک فورس کمیٹی برائے بورڈز مزمل محمود اور چیئرمین لاہور بورڈ انجینئر ڈاکٹر بدر الاسلام نے مشترکہ طور پر بٹن دبا کر رزلٹ کو باقاعدہ آن لائن کیا۔ تقریب میں ایڈیشنل سیکرٹری ہائر ایجوکیشن بورڈ نعمان جمیل، ڈائریکٹر کالجز احسن مختار اور کنٹرولر امتحانات توصیف الرحمن نے بھی خصوصاً شرکت کی۔ تقریب کے دوران لاہور بورڈ میں مجموعی طور پر پہلی پوزیشن حاصل کرنے والے دو نمایاں طلبہ کی حوصلہ افزائی کی گئی مبشرہ وسیم گورنمنٹ ڈگری کالج اسلام پورہ 1158 نمبر’ سید محمد محی الدین گورنمنٹ کالج یونیورسٹی نے1158 نمبر حاصل کیے ہیں۔ وزیرِ تعلیم رانا سکندر حیات اور بورڈ حکام کی جانب سے پہلی پوزیشن حاصل کرنے والے ان دونوں طلبہ کو ایک ایک لیپ ٹاپ، ایک ایک لاکھ روپے نقد انعام اور میڈلز سے نوازا گیا۔ دوسری اور تیسری پوزیشن حاصل کرنے والے طلبہ و طالبات کو ایک ایک لاکھ اور میڈلز سے نوازا گیا۔ وزیرِ تعلیم رانا سکندر حیات نے تمام کامیاب ہونے والے طلبہ، بالخصوص پوزیشن ہولڈرز، ان کے اساتذہ اور والدین کو مبارکباد دیتے ہوئے کہا کہ "ہمارے ہونہار طلبہ ہمارا اور ملک و قوم کا روشن مستقبل ہیں۔ حکومتِ پنجاب ان کی اعلیٰ تعلیم اور ترقی کے لیے تمام ممکنہ وسائل اور سرپرستی فراہم کرتی رہے گی۔
