جناح ہسپتال لاہور کے آئی وارڈ میں آگ بھڑک اٹھی’کسی قسم کا جانی نقصان نہیں ہوا

لاہور (جنرل رپورٹر) جناح ہسپتال لاہور کے آئی وارڈ میں اچانک آگ بھڑک اٹھنے سے خوف
و ہراس پھیل گیا تاہم واقعے میں کسی قسم کا جانی نقصان نہیں ہوا۔ ابتدائی اطلاعات کے مطابق او پی ڈی کے کمرہ نمبر30 میں پنکھے کے سوئچ میں سپارک کے باعث آگ لگی جس سے کمرے میں موجود سامان کو نقصان پہنچا۔ ہسپتال انتظامیہ کے مطابق آگ لگنے کے وقت وارڈ میں کوئی مریض یا عملے کا فرد موجود نہیں تھا۔ اطلاع ملتے ہی ہسپتال عملے، ریسکیو1122 اور فائر بریگیڈ کی ٹیموں نے موقع پر پہنچ کر بروقت کارروائی کرتے ہوئے آگ پر قابو پالیا۔ واقعے کے بعد پرنسپل پروفیسر ڈاکٹر طبیہ وسیم نے ایم ایس کے ہمراہ متاثرہ آئی وارڈ کا دورہ کیا اور صورتحال کا جائزہ لیا۔ انہوں نے وارڈ کے انتظامات اور حفاظتی اقدامات کا تفصیلی معائنہ کرتے ہوئے انتظامات مزید بہتر بنانے کی ہدایت کی۔ ہسپتال انتظامیہ نے واقعے کے بعد حفاظتی و انتظامی اقدامات کا بھی جائزہ لیا۔