سابق وزیراعلی پنجاب غلام حیدر وائیں کی 33ویں برسی آج منائی جائے گی

عبدالحکیم (این این آئی)ضلع خانیوال کی تحصیل میاں چنوں کی سیاسی تاریخ میں 33 سال قبل رونما ہونے والا سیاسی حادثہ ہر سال 29 ، ستمبر کو اہلیان علاقہ کے زخموں کو تازہ کر دیتا ہے جس میں سابق وزیراعلی پنجاب مسلم لیگ ن کے رہنما پنجاب بھر میں اپنی خداد صلاحیتوں کی بدولت عوام میں مقبول ہونیوالی شخصیت چودھری غلام حیدر وائیں کو عام انتخابات کے دوران الیکشن کمپین میں شہید کیا گیا یاد رہے کہ چودھری غلام حیدر وائیں نے سیاست کا آغاز بلدیاتی سیاست سے کیا بعد ازاں وہ اپنی بصیرت ، مدبرانہ سیاست اور بلا امتیاز عوامی خدمت کی بدولت ممبر ضلع کونسل اور رکن صوبائی اسمبلی منتخب ہوئے جس کے بعد قائد پاکستان مسلم لیگ ن میاں محمد نواز شریف نے ان پر اعتماد کرتے ہوئے انہیں وزیر اعلی پنجاب کی ذمہ داری سونپی مرحوم غلام حیدر وائیں نے پنجاب کا ایڈمنسٹر یٹر منتخب ہونے کے بعد عاجزی ، بندہ پروری ، عدل و انصاف کی پاسداری کا دامن تھامے رکھا اور علاقہ بھر میں ناقابل شکست ہوتے گئے جس سے حلقہ کی متوسط غریب عوام نے تو سکھ کا سانس لیا مگر حلقہ کے جاگیر دار سرمایہ دار اور موروثی سیاست دان غلام حیدر وائیں شہید کو اپنے راستہ کا کانٹا سمجھنے لگے اور آخر کار 29 ستمبر 1993 کو خدمت عظم اور محبت کے اس عظیم باب کو ہمیشہ کیلئے بند کر دیا ۔