چین اور پاکستان کے درمیان بحری علوم میں تعاون بڑھانے پر اتفاق

چنگ ڈائو (این این آئی)پاکستان بحری سائنس کے شعبے میں چین اور خطے کے دیگر ممالک کے ساتھ روابط مزید مستحکم کرنے کیلئے کوشاں ہے،صوبہ شان ڈونگ کے شہر چنگ ڈا میں منعقد ہونے والے چائنا سائوتھ ایشین کنٹریز میری ٹائم کوآپریشن فورم میں پاکستان، چین، سری لنکا، بنگلہ دیش، مالدیپ اور دیگر جنوبی ایشیائی ممالک کے 100 سے زائد نمائندوں، حکام اور ماہرین تعلیم نے شرکت کی۔چائنہ اکنامک نیٹ کے مطابق فورم کے شرکا نے چین-جنوبی ایشیائی ممالک میری ٹائم تعاون اقدام کی منظوری دی جس کا مقصد بحری سائنس، بلیو اکانومی اور پائیدار ترقی کے شعبوں میں علاقائی تعاون کو فروغ دینا ہے۔فورم میں سمندر اور موسمیاتی مشاہدات، موسم کی پیش گوئی، قدرتی آفات سے بچا ئواور نقصانات میں کمی، سمندری ماحولیاتی نظام کے تحفظ و بحالی، سمندری وسائل کے مربوط انتظام، بلیو اکانومی اور پائیدار ترقی سمیت مختلف امور پر تفصیلی تبادلہ خیال کیا گیا۔رپورٹ کے مطابق پاکستانی ماہرین نے فورم کے مباحث میں بھرپور شرکت کی۔ نیشنل انسٹی ٹیوٹ آف اوشیانوگرافی پاکستان کے ڈائریکٹر جنرل انجینئر نعمت اللہ سومرو نے سمندری تحفظ، موسمیاتی تبدیلیوں کے اثرات سے نمٹنے اور سمندروں کے درجہ حرارت میں اضافے سمیت مختلف امور پر پاکستان کی حکمت عملی اور تجربات سے شرکا کو آگاہ کیا۔ رپورٹ کے مطابق لسبیلا یونیورسٹی آف ایگریکلچر، واٹر اینڈ میرین سائنسز کے وائس چانسلر پروفیسر ڈاکٹر عبدالمالک نے سمندری ماحولیاتی نظام کے تحفظ اور پائیدار بلیو اکانومی کے فروغ میں یونیورسٹی کے کردار پر کلیدی خطاب کیا۔