پنجاب پولیس فنڈز کی کمی کے باعث مختلیف انتظامی و ترقییاتی امور متاثر ہونےلگے

لاہور (عامر رانا سے)پنجاب پولیس میں فنڈز کی کمی کے باعث مختلف انتظامی اور ترقیاتی امور متاثر ہونے لگے، اسٹیشنری اور پٹرول کی فراہمی سمیت نئی پولیس عمارتوں کی تعمیر کے منصوبے بھی تاخیر کا شکار ہونے کی اطلاعات ہیں۔ ذرائع کے  مطابق حالیہ احتجاج کے دوران اضافی سکیورٹی اور دیگر انتظامی اخراجات کے باعث پولیس کے دستیاب وسائل پر دبائو بڑھا ہے، جس کے نتیجے میں بعض اضلاع میں روزمرہ ضروریات پوری کرنے میں مشکلات سامنے آ رہی ہیں۔ ذرائع کا کہنا ہے کہ پولیس تھانوں کے لیے اسٹیشنری، گاڑیوں کے لیے پٹرول اور دیگر ضروری سامان کی فراہمی متاثر ہونے سے پولیس کے معمول کے کام بھی مشکلات کا شکار ہیں۔ بعض مقامات پر زیر تعمیر پولیس عمارتوں اور دیگر ترقیاتی منصوبوں پر کام کی رفتار بھی سست پڑنے کی اطلاعات ہیں۔ ذرائع کے مطابق سپیشل انیشیٹو پولیس اسٹیشنز یعنی ایس آئی پی ایس کی دیکھ بھال اور ضروری مرمت بھی فنڈز کی کمی سے متاثر ہو رہی ہے، جس کے باعث بعض تھانوں کی حالت پہلے کی نسبت خراب ہونے لگی ہے۔ پنجاب پولیس کے مطابق صوبے کے 737 تھانوں کو جدید سہولیات اور شہری دوست ماحول کے تحت اَپ گریڈ کیا گیا تھا، جبکہ متعدد سمارٹ پولیس اسٹیشنز بھی تعمیر کیے جاچکے ہیں۔ فنڈز کی کمی کا براہ راست اثر پولیس کی فیلڈ سرگرمیوں پر پڑنے کے خدشات بھی ظاہر کیے جا رہے ہیں، کیونکہ پٹرول اور گاڑیوں کی مرمت جیسے اخراجات پولیس کے روزمرہ آپریشنز کے لیے بنیادی حیثیت رکھتے ہیں۔ رواں مالی سال کے لیے پنجاب پولیس کی مختلف اشیائ، ٹرانسپورٹ، اسٹیشنری اور دیگر ضروریات کی خریداری کے ٹینڈرز جاری ہونا بھی محکمہ کی جاری آپریشنل ضروریات کو ظاہر کرتا ہے۔ شہریوں کا کہنا ہے کہ پولیس اسٹیشنز میں سہولیات کی کمی اور تعمیراتی کاموں میں تاخیر کا براہ راست اثر عوام کو ملنے والی پولیس سروسز پر پڑ سکتا ہے۔ شہریوں نے مطالبہ کیا ہے کہ پولیس کے روزمرہ اخراجات اور جاری ترقیاتی منصوبوں کے لیے بروقت فنڈز جاری کیے جائیں تاکہ تھانوں کی حالت بہتر رکھنے کے ساتھ ساتھ شہریوں کو فوری اور موثر پولیس سہولیات کی فراہمی بھی یقینی بنائی جاسکے۔