وزیراعظم کے’ سونے کے چنے’ کے بیان پر برآمد کنندگان کا ردعمل، مشکلات گنوا دیں

کراچی (بزنس رپورٹر) وزیراعظم کی جانب سے برآمد کنندگان کو ”سونے کے چنے کھلانے” کے بیان پر آل پاکستان ایکسپورٹرز ایسوسی ایشنز فورم کے چیف کوآرڈینیٹر محمد جاوید بلوانی نے برآمدی صنعت کو درپیش مشکلات گنواتے ہوئے کہا ہے کہ پالیسی سازی اور اس پر عمل درآمد وفاقی حکومت کے اختیار میں ہے، برآمد کنندگان کے نہیں۔ برآمدات اثاثہ ہیں، بوجھ نہیں، معیار نہیں بلکہ مسابقت کی کمی اور بلند پیداواری لاگت اصل مسئلہ ہے۔پاکستان سٹاک ایکسچینج میں وزیراعظم کے خطاب پر ردعمل دیتے ہوئے جاوید بلوانی نے کہا کہ برآمد کنندگان بلند پیداواری لاگت، بھاری ٹیکسز، مہنگی توانائی، پالیسیوں میں عدم استحکام، ریفنڈز میں تاخیر اور مسابقت کے منصفانہ مواقع کی کمی کے باوجود برآمدات بڑھانے کے لیے کام کر رہے ہیں۔ حکومت کو کاروبار کرنے کی لاگت، کاروبار میں آسانی اور مسابقت کے مسائل حل کرنا ہوں گے۔