محکمہ اوقاف لاہور میں نوکریاں دلانے کے نام پر شہریوں سے رقوم بٹورنے کا معاملہ سامنے آگیا

لاہور (خبر نگار) محکمہ اوقاف لاہور میں مبینہ طور پر نوکریاں دلانے کے نام پر شہریوں سے رقوم بٹورنے کا سنگین
معاملہ سامنے آگیا۔ زونل ایڈمنسٹریٹر اوقاف لاہور رانا احسان پر شہری بلاول سے اچھی سرکاری نوکری دلانے کے عوض 5 لاکھ 52 ہزار 200 روپے وصول کرنے کا الزام، متاثرہ شہری داد رسی کے لیے سیکرٹری اوقاف ڈاکٹر احسان بھٹہ کے پاس پہنچ گیا۔ درخواست پر محکمہ اوقاف نے مبینہ معاملے کی پروب انکوائری شروع کر دی۔ درخواست گزار بلاول نے مقف اختیار کیا ہے کہ جب رانا احسان میاں میر کے منیجر تعینات تھے تو اس کی پنکچر کی دکان تھی اور رانا احسان اپنی گاڑی کے ٹائروں کا کام وہاں کرواتے تھے۔ درخواست گزار کے مطابق ایک روز رانا احسان نے اس سے تعلیمی قابلیت دریافت کی، جس پر اس نے بتایا کہ وہ بی کام پاس ہے۔ الزام کے مطابق رانا احسان نے دعوی کیا کہ سیکرٹری اوقاف سے اس کے اچھے تعلقات ہیں اور وہ اسے اچھی سرکاری نوکری دلوا سکتے ہیں، جس کے عوض پانچ لاکھ روپے دینے کا مطالبہ کیا گیا۔ بلاول کے مطابق نوکری کے حصول کی امید پر اس نے مبینہ طور پر رانا احسان کی جانب سے فراہم کردہ جاز کیش نمبر 03082726763 پر ایک ہفتے کے دوران 4 لاکھ 58 ہزار روپے منتقل کیے، جبکہ 94 ہزار 200 روپے نقد ادا کیے گئے۔ درخواست گزار کا کہنا ہے کہ رقوم کی ادائیگی کے ثبوت اور رسیدیں بھی اس کے پاس موجود ہیں۔ درخواست گزار کے مطابق رقم وصول کرنے کے بعد اس نے متعدد مرتبہ رانا احسان سے نوکری کے حوالے سے رابطہ کیا، تاہم اسے مسلسل ٹال مٹول اور یقین دہانیوں کے ذریعے مبینہ طور پر لٹکایا جاتا رہا۔ بلاول کا کہنا ہے کہ اب رانا احسان زونل ایڈمنسٹریٹر اوقاف کے عہدے پر بھی تعینات ہو چکے ہیں، مگر نہ تو اسے نوکری ملی اور نہ ہی مبینہ طور پر ادا کی گئی رقم واپس کی گئی۔ متاثرہ شہری نے سیکرٹری اوقاف ڈاکٹر احسان بھٹہ سے مطالبہ کیا ہے کہ معاملے کی شفاف تحقیقات کروا کر اس کی رقم واپس دلوائی جائے اور اگر الزامات درست ثابت ہوں تو ذمہ دار افسر کے خلاف قانون اور محکمانہ قواعد کے مطابق کارروائی عمل میں لائی جائے۔ ذرائع کے مطابق درخواست موصول ہونے کے بعد سیکرٹری اوقاف ڈاکٹر احسان بھٹہ نے معاملے کی پروب انکوائری شروع کروا دی ہے۔ اب انکوائری میں یہ امر بھی سامنے آئے گا کہ شہری سے رقوم کس بنیاد پر وصول کی گئیں، جاز کیش اکانٹ کس کے نام پر ہے اور رقم کی وصولی کے الزامات میں کتنی صداقت ہے۔