روس نے یوکرین پر بڑے پیمانے پر ڈرونز اور میزائلوں سے حملے کیے، جن کے نتیجے میں کم از کم 8 افراد ہلاک اور متعدد زخمی ہوگئے۔
یوکرینی حکام کے مطابق دارالحکومت کیف میں 2، شمالی شہر پریلوکی میں 4 جبکہ پولتاوا کے علاقے میں 2 افراد ہلاک ہوئے۔ پریلوکی میں روسی میزائل ایک پانچ منزلہ رہائشی عمارت سے ٹکرا گیا، جس کے نتیجے میں عمارت کا ایک حصہ منہدم ہوگیا۔ حکام کے مطابق کم از کم 20 افراد زخمی ہوئے، جن میں 3 بچے بھی شامل ہیں۔
یوکرینی فضائیہ کے مطابق روس نے حملے میں 130 ڈرونز اور 48 کروز میزائلز کے علاوہ بیلسٹک میزائل بھی استعمال کیے، جبکہ فضائی دفاعی نظام نے 161 فضائی اہداف کو تباہ کرنے کا دعویٰ کیا۔ حملوں کا نشانہ کیف، پولتاوا، دنیپروپیٹروفسک اور خارکیف سمیت کئی علاقے بنے۔
روسی وزارت دفاع نے حملوں کو ’’بڑے پیمانے کی کارروائی‘‘ قرار دیتے ہوئے کہا کہ اس نے یوکرین کی فوجی صنعتی تنصیبات کو نشانہ بنایا، جبکہ یوکرینی حکام نے رہائشی اور شہری علاقوں کو پہنچنے والے نقصان کی اطلاع دی۔
روس کا یوکرین پر میزائل اور ڈرون حملہ، 8 افراد ہلاک
