فیصل آباد مختلف میں واقعات فائرنگ سے ماں بیٹی اور باپ بیٹا قتل

فیصل آباد(بیورورپورٹ)مختلف علاقوں میں فائرنگ سے ماں بیٹی اور باپ بیٹے کو قتل کر دیا گیا جبکہ دو افراد زخمی ہو گئے، تفصیل کے مطابق فیکٹری ایریا کے علاقہ خالد آباد میں گلی نمبر سات میں گھریلو تنازعہ پر ملزم بدر زمان بٹ ولد غلام نبی نے اندھادھند فائرنگ کر کے اپنی بھابھی چالیس سالہ ثمن بی بی زوجہ رضوان، تیرہ سالہ بھتیجی میرب بی بی کو قتل اور اپنے بھائی پینتالیس سالہ رضوان کو شدید زخمی کر دیا اور فرار ہو گیا، تھانہ چک جھمرہ کے علاقہ ڈوگراں والا پھاٹک کے قریب نامعلوم مسلح ملزمان نے اندھا دھند فائرنگ کر کے عصمت اللہ دیال اور اس کے بیٹے شیری دیال کو قتل کر دیا اور اسلحہ لہراتے ہوئے فرار ہو گئے، تھانہ سمن آباد کے علاقے داتا چوک مظفر کالونی میں نامعلوم موٹر سائیکل سوار نے فائرنگ کر کے شاہد سہیل کو شدید زخمی کر دیا اور فرار ہو گیا, زخمیوں کو ہسپتال منتقل کر دیا گیا ہے، پولیس نے نعشوں کو تحویل میں لے کر پوسٹ مارٹم کے لیے ہسپتال منتقل کر دیا ہے، آئی جی پنجاب عبدالکریم نے فیصل آباد کے دو مقامات پر دوہرے قتل کا نوٹس لیتے ہوئے آر پی او فیصل آباد سے رپورٹ طلب کر لی، آئی جی پنجاب نے سی پی او فیصل آباد کو فائرنگ میں ملوث ملزمان کی فوری گرفتاری کا حکم دیا ہے، آئی جی پنجاب کا کہنا تھا کہ ملزمان کی گرفتاری کے لئے تمام وسائل بروئے کار لائے جائیں جبکہ سی پی او فیصل آباد نے نوٹس لیتے ہوئے ایس پی مدینہ ڈویڑن سے رپورٹ طلب کر لی ہے، ملزمان کی گرفتاری کے لئے ٹیمیں تشکیل دے دی گئیں ہیں۔