لا ہور میں منشیات کی فروخت اور تر سیل کے حوالے تشویش ناک اطلاعات کی بھر مارا

لاہور (رپورٹ: عامر رانا) کرائم کنٹرول ڈیپارٹمنٹ (سی سی ڈی)، پنجاب پولیس، ایکسائز
اور نارکوٹکس کنٹرول سمیت متعلقہ اداروں کی جانب سے منشیات کی روک تھام کے لیے کارروائیوں کے باوجود لاہور میں منشیات کی فروخت اور ترسیل کے حوالے سے تشویشناک اطلاعات سامنے آنے لگی ہیں۔ ذرائع کے مطابق شہر میں چرس، آئس، ویٹ اور مبینہ طور پر زہریلے انجکشنوں کی فروخت کا سلسلہ جاری ہے، جبکہ منشیات کا کاروبار روایتی طریقوں سے آگے بڑھ کر ڈیجیٹل ذرائع تک پھیلنے کے دعوے بھی کیے جا رہے ہیں۔ صورتحال نے قانون نافذ کرنے والے اداروں کی حکمت عملی، نگرانی کے نظام اور منشیات فروشوں کے خلاف کارروائیوں کے نتائج پر سوالات کھڑے کر دیئے ہیں۔ پولیس ذرائع کے مطابق لاہور میں روزانہ اوسطاً 9 سے 17 تک منشیات فروشی کے مقدمات درج کیے جانے کے باوجود شہر میں منشیات کی ترسیل کو مکمل طور پر روکنا ایک بڑا چیلنج بنا ہوا ہے۔ ذرائع کا کہنا ہے کہ منشیات کی خریدو فروخت کے نیٹ ورک مختلف علاقوں میں سرگرم ہیں، جہاں مقامی سطح پر فروخت کرنے والوں سے لے کر مبینہ طور پر بڑے سپلائی نیٹ ورکس تک مختلف حلقے کام کر رہے ہیں۔ تاہم ان اعداد و شمار اور دعوئوں کی سرکاری سطح پر تصدیق ضروری ہے تاہم دوسری جانب فٹ پاتھوں سے لاشیں ملنے کے واقعات تشویش کا باعث منشیات کے استعمال سے جڑے انسانی المیے کے حوالے سے ایدھی ذرائع سے منسوب اطلاعات میں دعویٰ کیا گیا ہے کہ لاہور میں روزانہ دو سے پانچ ایسے افراد کی لاشیں فٹ پاتھوں سے ملنے کے واقعات رپورٹ ہوتے ہیں جن کے بارے میں منشیات کے استعمال کا شبہ ظاہر کیا جاتا ہے۔ اگرچہ ہر واقعے کی وجہ موت کا تعین طبی معائنے اور متعلقہ تحقیقات کے بعد ہی ممکن ہے، تاہم یہ اطلاعات نشے کے عادی افراد کی بحالی، فوری طبی امداد اور سماجی تحفظ کے نظام کو مثر بنانے کی ضرورت اجاگر کرتی ہیں۔ ماہرینِ صحت کے مطابق منشیات کا مسئلہ محض پولیس کارروائیوں تک محدود نہیں، بلکہ اس کے ساتھ علاج، بحالی، ذہنی صحت سے متعلق معاونت اور متاثرہ خاندانوں کی رہنمائی بھی ضروری ہے۔ نشے کے عادی افراد کو بروقت طبی سہولتیں اور بحالی کی خدمات فراہم نہ کی جائیں تو ان کی زندگیوں کو لاحق خطرات بڑھ سکتے ہیں۔لاہور میں منشیات کے مبینہ پھیلتے نیٹ ورک کے تناظر میں شہریوں کی توقع ہے کہ پنجاب پولیس، سی سی ڈی، ایکسائز اور نارکوٹکس کنٹرول کے متعلقہ حکام مشترکہ حکمت عملی مرتب کریں۔ اس میں بڑے سپلائی نیٹ ورکس کی تحقیقات، مالی لین دین کی قانونی جانچ، ڈیجیٹل شواہد کا تجزیہ، تعلیمی اداروں کے تحفظ اور منشیات سے متاثرہ افراد کی بحالی کو ترجیح دی جانی چاہیے۔ منشیات کے خلاف کارروائیوں کے نتائج جانچنے کے لیے درج مقدمات اور گرفتاریوں کے ساتھ یہ بھی دیکھا جانا چاہیے کہ سپلائی میں کتنی کمی آئی، بڑے نیٹ ورکس کے خلاف کیا پیشرفت ہوئی اور متاثرہ افراد کو علاج و بحالی کی کتنی سہولتیں فراہم کی گئیں۔ لاہور جیسے بڑے شہر میں منشیات کی روک تھام ایک پیچیدہ مگر اہم ذمہ داری ہے۔ اس مقصد کے لیے مربوط نگرانی، شفاف تحقیقات، قانون کے مطابق بلاامتیاز کارروائی اور علاج و بحالی کی سہولتوں کو یکجا کرنا ضروری ہے۔ ذرائع کی جانب سے سامنے آنے والے اعداد و شمار اور الزامات کی سرکاری تصدیق اور متعلقہ اداروں کا مقف سامنے آنے سے صورت حال کی زیادہ واضح تصویر سامنے آسکتی ہے۔