گوجرخان (بیورو رپورٹ)الہادی پبلک سکول مطوعہ کے سامنے ٹریفک حادثہ، تین سالہ بچہ جاں بحق۔ اسکول کے سامنے اسپیڈ بریکرز کی تنصیب کے لیے پہلے بھی درخواست دی گئی تھی، انتظامیہ کا متعلقہ حکام سے فوری اقدامات کا مطالبہ۔گوجرخان (بیورو رپورٹ) الہادی پبلک سکول مطوعہ کے سامنے ٹریفک حادثے میں تین سالہ معصوم بچہ جاں بحق ہو
گیا، افسوسناک واقعے کے بعد علاقے میں سوگ کی فضا چھا گئی۔ جاں بحق ہونے والا بچہ اپنی والدہ کے ہمراہ اسکول آیا تھا، جہاں اس کی بہن زیرِ تعلیم ہے۔الہادی پبلک اسکول کی انتظامیہ اور عملے نے المناک حادثے پر گہرے دکھ اور افسوس کا اظہار کرتے ہوئے سوگوار خاندان سے دلی تعزیت کی ہے اور دعا کی ہے کہ اللہ تعالی مرحوم بچے کی مغفرت اور لواحقین کو صبرِ جمیل عطا فرمائے۔اسکول انتظامیہ کے مطابق اس سے قبل بھی اسکول کے سامنے ایک ٹریفک حادثہ پیش آ چکا ہے، جس میں ایک بچہ زخمی ہوا تھا۔ اس واقعے کے بعد طلبہ اور شہریوں کی حفاظت کے پیشِ نظر اسکول کے سامنے اسپیڈ بریکرز کی تنصیب کے لیے اسسٹنٹ کمشنر کے دفتر میں درخواست جمع کروائی گئی تھی۔ انتظامیہ کے مطابق درخواست کا ڈائری نمبر 286/HC، مورخہ 26 جنوری 2026 (CRO-I) ہے، تاہم تاحال اس پر عملی کارروائی نہیں ہو سکی۔اسکول انتظامیہ نے اسسٹنٹ کمشنر اور متعلقہ حکام سے مطالبہ کیا ہے کہ اسکول کے سامنے فوری طور پر اسپیڈ بریکرز نصب کیے جائیں، روڈ سیفٹی سائن بورڈز لگائے جائیں اور معیاری زیبرا کراسنگ تعمیر کی جائے تاکہ طلبہ، والدین اور دیگر شہریوں کی محفوظ آمدورفت یقینی بنائی جا سکے اور مستقبل میں ایسے افسوسناک حادثات کی روک تھام ممکن ہو۔سنتظامیہ نے متعلقہ حکام پر زور دیا ہے کہ عوامی تحفظ کے اس اہم معاملے پر فوری توجہ دیتے ہوئے عملی اقدامات کیے جائیں۔
