اٹک ( ڈسٹرکٹ رپو رٹر ) 1906ء میں قائم تاریخی گورنمنٹ پائلٹ سیکنڈری سکول اٹک میں کلاس رومز اور واش رومز کی شدید کمی1400 سے زائد طلباء مشکلات کا شکار، وزیر تعلیم پنجاب، سیکرٹری تعلیم، کمشنر راولپنڈی اور ڈپٹی کمشنر اٹک سے فورنوٹس لینے کا مطالبہ ، تفصیلات کے مطابق گورنمنٹ پائلٹ سیکنڈری سکول اٹک ضلع کے قدیم اور تاریخی تعلیمی اداروں میں نمایاں مقام رکھتا ہے، 1906ء میں قائم ہونے والی اس درس گاہ نے ایک صدی سے زائد عرصے تک علم کی روشنی پھیلائی اور اٹک کی تعلیمی و سماجی ترقی میں اہم کردار ادا کیا، اس ادارے سے متعدد افسران، سیاست دانوں، انجینئرز، ڈاکٹروں اور مختلف شعبوں میں نمایاں خدمات انجام دینے والی شخصیات نے تعلیم حاصل کی، تاہم افسوس ناک امر یہ ہے کہ اس تاریخی ادارے میں آج طلباء کو بنیادی تعلیمی سہولیات کی کمی کا سامنا ہے،ذرائع کے مطابق سکول میں 1400 سے زائد طلباء زیر تعلیم ہیں، جبکہ ان کی تعداد کے تناسب سے کلاس رومز ناکافی ہیں، اساتذہ کی تعداد تسلی بخش ہونے کے باوجود کمروں کی کمی کے باعث مزید سیکشنز قائم نہیں کیے جا سکتے، جس کی وجہ سے موجودہ کلاس رومز میں گنجائش سے زیادہ طلباء کو بٹھانا پڑتا ہے، اس صورتِ حال سے نہ صرف طلباء کی تعلیمی سرگرمیاں متاثر ہو رہی ہیں بلکہ مناسب تدریسی ماحول برقرار رکھنا بھی مشکل ہو گیا ہے، مزید تشویش ناک بات یہ ہے کہ سکول میں واش رومز کی تعداد بھی صرف آٹھ رہ گئی ہے، جو طلباء کی موجودہ تعداد کے لحاظ سے ناکافی ہے، ذرائع کے مطابق تقریباً چار سال قبل ڈسٹرکٹ پبلک سکول اٹک کے آغاز کے وقت اس کی اپنی عمارت موجود نہیں تھی، چنانچہ عارضی انتظام کے تحت گورنمنٹ پائلٹ سیکنڈری سکول کے دس کلاس رومز، ایک لائبریری اور دس واش رومز ڈسٹرکٹ پبلک سکول کو فراہم کیے گئے تھے، بتایا گیا تھا کہ ڈسٹرکٹ پبلک سکول کی اپنی عمارت تعمیر ہونے کے بعد یہ سہولیات واپس پائلٹ سکول کے حوالے کر دی جائیں گی، ذرائع کا کہنا ہے کہ ڈسٹرکٹ پبلک سکول کی اپنی عمارت گزشتہ دو سال سے تعمیر ہو چکی ہے، لیکن اس کے باوجود پائلٹ سکول کے فراہم کردہ کلاس رومز، لائبریری اور دس واش رومز تاحال واپس نہیں کیے گئے۔ اس وجہ سے تاریخی پائلٹ سکول میں طلباء کی بڑھتی ہوئی تعداد کے مطابق تعلیمی سہولیات کی فراہمی میں مشکلات برقرار ہیں۔ ذرائع کے مطابق اس معاملے کی نشاندہی سی ای او اٹک اور ڈی ای او سیکنڈری اٹک کے سامنے بھی کی گئی، تاہم تاحال کوئی مؤثر پیش رفت سامنے نہیں آ سکی، تعلیمی حلقوں اور والدین نے وزیر تعلیم پنجاب، سیکرٹری تعلیم پنجاب، کمشنر راولپنڈی ڈویژن اور ڈپٹی کمشنر اٹک سے مطالبہ کیا ہے کہ اس اہم معاملے کا فوری نوٹس لیا جائے اور ڈسٹرکٹ پبلک سکول کے لیے عارضی طور پر مختص کیے گئے کلاس رومز، لائبریری اور واش رومز واپس گورنمنٹ پائلٹ سیکنڈری سکول کی انتظامیہ کے حوالے کرنے کے لیے ضروری اقدامات کیے جائیں، تاکہ 1400 سے زائد طلباء کو بہتر تعلیمی ماحول میسر آ سکے اور اٹک کے اس تاریخی ادارے کی تعلیمی ضروریات پوری ہو سکیں۔
