درا اندازی کی کوشش ناکام 12 خوارج افغان طالبان ہلاک نائب صوبیدار شہید

راولپنڈی، کوئٹہ(نیوز ایجنسیاں )سکیورٹی فورسز نے ضلع کرم میں پاک افغان سرحد پر خوارج کے ایک گروہ کی دراندازی کی کوشش ناکام بنا تےہوئے 12خوارج اور افغان طالبان کو ہلاک کردیا جبکہ پاک فوج کے نائب صوبیدار ہدایت امان نے بہادری سے لڑتے ہوئے جامِ شہادت نوش کیا ۔ادھر سکیورٹی فورسز اور ایف سی بلوچستان نے آپریشن ردالفتنہ 3کے تحت مشترکہ کارروائی کرتے ہوئے افغانستان سے اسلحہ کی سمگلنگ کی کوشش ناکام بنا دی۔ جبکہ فراری کمانڈر وزیراعلیٰ بلوچستان کے سامنے ہتھیارپھینک کر قومی دھارے میں شامل ہوگیا۔ پاک فوج کے شعبہ تعلقات عامہ (آئی ایس پی آر) کے مطابق 10اکتوبر 2026کو ضلع کرم میں پاک افغان سرحد پر خوارج کے ایک گروہ کی جانب سے دراندازی کی کوشش کی گئی۔سکیورٹی فورسز نے پاک افغان سرحد کے قریب دراندازی کی کوشش کرنے والے خوارج کو موثر کارروائی کا نشانہ بنایا، افغان طالبان کی پوسٹوں نے دراندازی کی کوشش کرنے والے خوارج کی مدد کیلئے بھی فائرنگ کی سکیورٹی فورسز کی موثراور درست جوابی کارروائی میں 12 خوارج اور افغان طالبان ہلاک ہوگئے۔ فائرنگ کے شدید تبادلے میں نائب صوبیدار ہدایت امان نے بہادری سے لڑتے ہوئے جامِ شہادت نوش کیا، شہید نائب صوبیدار ہدایت امان کی عمر 40 سال اور تعلق ضلع غذر سے تھا۔ترجمان پاک فوج کے مطابق یہ واقعہ افغان طالبان رجیم کی جانب سے افغان سر زمین دہشت گردی کیلئے استعمال ہونے سے روکنے میں ناکامی کا ایک اور ثبوت ہے، افغان طالبان رجیم مسلسل اپنی بین الاقوامی انسدادِ دہشت گردی ذمہ داریاں پوری کرنے میں ناکام رہی ہے۔پاک افغان سرحد پر سکیورٹی فورسز ہائی الرٹ رہتے ہوئے ملکی سرحدوں کے دفاع کیلئے پرعزم ہیں، علاقے میں ممکنہ طور پر موجود دیگر خوارج کے خاتمے کیلئے کلیئرنس آپریشن جاری ہے۔ عزمِ استحکام کے تحت دہشت گردی کے مکمل خاتمے کیلئے سکیورٹی فورسز اور قانون نافذ کرنے والے اداروں کی کارروائیاں پوری رفتار سے جاری رہیں گی، پاک فوج کے بہادر جوانوں کی قربانیاں ملکی سرحدوں کے دفاع اور دہشت گردی کے خاتمے کے غیر متزلزل عزم کو مزید مضبوط کرتی ہیں۔دریں اثناء سکیورٹی فورسز اور ایف سی بلوچستان نے آپریشن ردالفتنہ 3 کے تحت مشترکہ کارروائی کرتے ہوئے افغانستان سے اسلحہ کی سمگلنگ کی کوشش ناکام بنا دی۔سکیورٹی ذرائع کے مطابق سکیورٹی فورسز نے ضلع پشین میں انٹیلی جنس بیسڈ کارروائی کر کے افغانستان سے گولہ بارود منتقل کرنے کا منصوبہ ناکام بنایا۔ذرائع کا کہنا ہے کہ ضلع پشین کے علاقہ سرانان میں سکیورٹی فورسز نے گودام پر چھاپہ مار کر اسلحہ و گولہ بارود سے بھری گاڑی پکڑ لی، گاڑی سے 3 آر پی جی، 4 لائٹ مشین گنز، مشین گن، دستی بم، راکٹس اور بھاری مقدار میں گولہ بارود برآمد کیا گیا۔سکیورٹی ذرائع کے مطابق کارروائی کے بعد علاقے میں دہشت گرد عناصر کی ممکنہ موجودگی کے پیش نظر تاحال سرچ آپریشن جاری ہے۔سکیورٹی فورسز اور قانون نافذ کرنے والے ادارے بلوچستان میں امن واستحکام کے قیام اور دہشت گردی کے خاتمے کیلئے پرعزم ہیں۔قبل ازیںفراری کمانڈر نور خان بگٹی ساتھیوں سمیت وزیراعلی بلوچستان کے سامنے ہتھیارپھینک کر قومی دھارے میں شامل ہوگئے۔پاکستان ہائو س سوئی میں وزیراعلی بلوچستان میر سرفراز بگٹی کی کھلی کچہری کے دوران سرنڈر کی تقریب ہوئی،اس موقع پرفراری کمانڈر نور خان بگٹی اور ان کے ساتھیوں نے پاکستان سے وفاداری کا حلف اٹھا لیا۔فراری کمانڈر نور خان بگٹی گزشتہ 20 سال سے پہاڑوں میں موجود تھے، آج ساتھیوں سمیت سرنڈر ہوگئے،وہ ماضی میں درجنوں دہشت گرد کارروائیوں میں ملوث رہے ہیں،سرنڈر کرنے والے نور خان بگٹی اپنے خاندان سمیت سوئی میں آباد ہوں گے۔ نور خان بگٹی کے سرنڈر کے بعد علاقے میں دہشت گردی کی کارروائیوں میں کمی کی توقع ظاہر کی جا رہی ہے۔
طالبان ہلاک