ریاض ایئرپورٹ پر میزائل حملے کے بعد پاکستانی پروازیں معطل، متعدد منسوخ

کراچی (این این آئی) سعودی دارالحکومت ریاض کے شاہ خالد انٹرنیشنل ایئرپورٹ پر میزائل حملے کے بعد حفاظتی اقدامات کے تحت پاکستان سے ریاض جانے والی متعدد پروازیں معطل اور منسوخ کر دی گئی ہیں۔ پاکستان ایئرپورٹس اتھارٹی کے مطابق پاکستان انٹرنیشنل ایئر لائنز (پی آئی اے) کا ریاض کے لیے فضائی آپریشن مکمل طور پر معطل کر دیا گیا ہے جبکہ دیگر نجی فضائی کمپنیوں کی پروازیں بھی متاثر ہوئی ہیں۔ پاکستان ایئرپورٹس اتھارٹی کے مطابق فلائی جناح کی لاہور اور کراچی سے ریاض جانے والی پروازیں منسوخ کر دی گئی ہیں۔ اسی طرح کراچی سے ریاض جانے والی فلائی ناس کی پرواز بھی منسوخ کردی گئی جبکہ فلائی ناس کی کراچی سے مدینہ جانے والی پرواز تکنیکی وجوہات کی بنا پر منسوخ ہوئی۔ اتھارٹی کا کہنا ہے کہ لاہور، کراچی، پشاور اور اسلام آباد سے جدہ اور مدینہ جانے والی پروازیں معمول کے مطابق جاری ہیں۔