پنجاب’ صفائی ورکرز کو تنخواہوں کی عدم ادائیگی پر26 تحصیلوں میں صفائی فرمز کے کنٹریکٹ منسوخ کر دیئے گئے

لاہور( این این آئی)پنجاب حکومت نے صفائی
میں غفلت اور ورکرز کو تنخواہوں کی عدم ادائیگی پر سخت اقدام کرتے ہوئے 26تحصیلوں میں صفائی فرمز کے کنٹریکٹ منسوخ کردئیے گئے ۔حکومت نے متعلقہ تحصیلوں میں 90روزہ سیلف آپریشن شروع کرنے کی ہدایت کردی جس کے تحت صفائی کا نظام عارضی طور پر سرکاری انتظام میں چلایا جائے گا۔ذرائع کے مطابق ناقص کارکردگی اور انتظامی بدانتظامی کی شکایات پر پہلے مرحلے میں 21 تحصیلوں میں صفائی کے کنٹریکٹ منسوخ کرنے کا اصولی فیصلہ کیا گیا ہے، ان 21 تحصیلوں میں صفائی کا کنٹریکٹ ایک ہی کمپنی نے حاصل کیا تھا۔ مجموعی طور پر پنجاب کی 26 تحصیلوں میں کنٹریکٹ منسوخ کیے جائیں گے۔ذرائع کے مطابق کنٹریکٹ منسوخ ہونے والی تحصیلوں میں مشینری کی ہینڈنگ اوور اور ٹیکنگ اوور کا عمل جاری ہے جبکہ ویسٹ کلیکشن آن سورس کے انتظامات کیلئے بھی کام شروع کردیا گیا ہے۔