لاہور (این این آئی) لاہور الیکٹرک سپلائی کمپنی (لیسکو)کی جانب سے شہر سمیت مختلف علاقوں میں بجلی چوری کے خلاف آپریشن بھرپور انداز میں جاری ہے،کارروائیوں کے دوران بجلی چوری کے 217 کیسز سامنے آئے، جن میں سے 66 مقدمات درج کیے گئے جبکہ 4افراد کو گرفتار کر لیا گیا۔لیسکو حکام کے مطابق بجلی چوری میں ملوث عناصر کے خلاف کارروائیوں کے دوران مجموعی طور پر 2لاکھ 63ہزار 483یونٹس چارج کیے گئے جبکہ بجلی چوری کی مد میں 29لاکھ 67ہزار روپے کی ریکوری بھی کی گئی۔حکام کے مطابق مختلف سرکلز میں بجلی چوری کے کیسز رپورٹ ہوئے، جن میں اوکاڑہ سرکل سرفہرست رہا جہاں بجلی چوری کے سب سے زیادہ 71 کیسز سامنے آئے۔شیخوپورہ سرکل میں بجلی چوری کے 47کیسز رپورٹ ہوئے جبکہ ناردرن اور سنٹرل لاہور میں مجموعی طور پر 32 کیسز سامنے آئے۔اسی طرح قصور سرکل میں بجلی چوری کے 22کیسز رپورٹ ہوئے، جبکہ سدرن لاہور میں 11اور ننکانہ سرکل میں 2 کیسز سامنے آئے۔انجینئر محمد رمضان بٹ کے مطابق بجلی چوری کے خاتمے اور بجلی کے نظام کو ہونے والے مالی نقصان کی روک تھام کے لیے کارروائیاں جاری ہیں۔ بجلی چوری میں ملوث عناصر کے خلاف قانون کے مطابق کارروائی عمل میں لائی جا رہی ہے۔لیسکو حکام نے واضح کیا کہ بجلی چوری کے خلاف آپریشن بلا امتیاز جاری رہے گا اور اس غیر قانونی عمل میں ملوث افراد کے خلاف قانونی کارروائی کے ساتھ واجبات کی وصولی بھی یقینی بنائی جائے گی۔
