مٹھی، کوئلے سے بجلی پیدا کرنے والی کمپنی میں حادثہ،2 محنت کش جھلس گئے، حالت تشویشناک

کراچی (این این آئی) مٹھی میں کوئلے سے بجلی
پیدا کرنے والی کمپنی میں حادثے کے نتیجے میں جھلسنے والے دو محنت کشوں کو تشویشناک حالت میں سول ہسپتال کراچی کے برنس وارڈ منتقل کر دیا گیا، جہاں دونوں کی حالت انتہائی نازک بتائی جاتی ہے۔ پولیس کے مطابق زخمی محنت کشوں کی شناخت جے کمار اور صحبت خان کے نام سے ہوئی ہے۔ جے کمار کا 91 فیصد سے زائد جبکہ صحبت خان کا 75 فیصد جسم جھلس چکا ہے۔ دونوں کو فوری طبی امداد فراہم کی جا رہی ہے۔ جے کمار کے والد اشوک کے مطابق ان کا بیٹا کوئلے سے بجلی پیدا کرنے والی کمپنی میں کام کرتا ہے اور ایک بچی کا باپ ہے۔ انہوں نے کہا کہ جے کمار دوسری مرتبہ کمپنی میں حادثے کا شکار ہوا ہے۔ اشوک نے بتایا کہ وہ سول ہسپتال کے برنس وارڈ میں فراہم کیے جانے والے علاج سے مطمئن ہیں اور کمپنی کی جانب سے متعدد افراد ان سے بات چیت کے لیے آ رہے ہیں، تاہم ان کی اولین ترجیح بیٹے کی جان بچانا ہے، جس کے بعد وہ کمپنی انتظامیہ سے بات کریں گے۔ زخمی محنت کشوں کی جان بچانے کے لیے علاج جاری ہے، جبکہ حادثے کی وجوہات اور کمپنی انتظامیہ کی ذمہ داری کے حوالے سے مزید تفصیلات سامنے نہیں آسکیں۔