جعلی ادویات کی روک تھام کیلئے ٹریک اینڈ ٹریس نظام نافذ

کراچی(این این آئی)ملک میں جعلی، غیر معیاری اور غیر رجسٹرڈ ادویات کی روک تھام کے لیے ڈرگ ریگولیٹری اتھارٹی پاکستان (ڈریپ) نے ادویات کی شناخت اور نگرانی کا نظام نافذ کر دیا ہے۔ نئے نظام کے تحت ادویات کے پیکٹ پر منفرد دو رخی رمز اور سیریل نمبر درج کرنا لازمی قرار دیا گیا ہے، جبکہ مقررہ شرائط پوری کیے بغیر ادویات کی درآمد اور فروخت پر پابندی ہوگی۔ذرائع کے مطابق ڈریپ نے دوا ساز کمپنیوں اور درآمد کنندگان کو رمز اور سیریل نمبر درج کرنے کے حوالے سے حتمی ہدایات جاری کر دی ہیں۔ اس نظام کا اطلاق انسانی اور حیوانی ادویات تیار کرنے والی کمپنیوں کے ساتھ ادویات کے درآمد کنندگان پر بھی ہوگا۔ڈریپ کی جانب سے جاری مراسلے میں فارماسیوٹیکل، حیاتیاتی اور حیوانی ادویات کے درآمد کنندگان، پاکستان فارما مینوفیکچررز ایسوسی ایشن، فارما بیورو، آزاد کشمیر، گلگت بلتستان اور چاروں صوبوں کے محکمہ ہائے صحت کو نظام پر عمل درآمد کے حوالے سے آگاہ کیا گیا ہے۔