بھاری ٹیکس اورغیریقینی معاشی صورتحال،40 فیصد سے زائدپاور لومزغیرفعال

کراچی (این این آئی) غیر یقینی معاشی صورتحال، بھاری ٹیکسوں اور بجلی و گیس کی بلند قیمتوں کے باعث پاکستان میں 40 فیصد سے زائد پاور لومز بھی غیر فعال ہوگئی ہیں، جبکہ اس سے قبل 500 سے زائد کاٹن جننگ فیکٹریاں اور 200 کے قریب ٹیکسٹائل ملیں بند ہوچکی ہیں۔ پیداواری لاگت حریف ممالک کے برابر نہ ہونے کے باعث مقامی کاٹن صنعت کی بقا کو شدید خطرات لاحق ہوگئے ہیں۔ چیئرمین کاٹن جنرز فورم احسان الحق نے کپاس اور کاٹن صنعت کی فوری بحالی کے لیے وفاقی اور صوبائی حکومتوں سے کسان دوست اور صنعت کے فروغ کے لیے سازگار پالیسیاں متعارف کرانے کا مطالبہ کیا ہے۔ انہوں نے کہا کہ ناموافق موسمی حالات کے باعث روئی کا معیار متاثر ہونے سے اس کی درآمدات اور قیمتوں میں اضافے کا رجحان دیکھا جارہا ہے۔