ٹک ٹاک کا جنون 2جانیں نگل گیا، فائرنگ سے بھابی اور سگی بہن جاں بحق

کالا شاہ کاکو (این این آئی) مریدکے کے علاقے ننگل کسووال میں ٹک ٹاک ویڈیو بنانے
کے معمولی تنازع پر دو بھائیوں کے درمیان تلخ کلامی خونریز تصادم کی شکل اختیار کر گئی جس کے نتیجے میں فائرنگ سے ملزم کی بھابی اور سگی بہن جاں بحق ہو گئیں۔ تفصیلات کے مطابق ننگل کسووال میں بہن اور بھابی کے ٹک ٹاک بنانے سے منع کرنے پر مبینہ طور پر دو بھائیوں عدنان اور لقمان کے درمیان شدید تکرار ہوئی’ طیش میں آکر بڑے بھائی عدنان نے چھوٹے بھائی لقمان پر سیدھی فائرنگ کر دی اس دوران لقمان کی22 سالہ بیوی مریم اپنے شوہر کو بچانے کے لیے آگے بڑھی تو گولی کا نشانہ بن گئی جبکہ مریم کے پیچھے کھڑی 20 سالہ بہن زینب بھی اسی گولی کی زد میں آگئی۔ پولیس کے مطابق گولی مقتولہ مریم کے سر کو چیرتی ہوئی زینب کے سینے میں جالگی۔ ریسکیو حکام کے مطابق ملزم عدنان کی بھابی مریم زخموں کی تاب نہ لاتے ہوئے موقع پر ہی دم توڑ گئی جبکہ شدید زخمی بہن زینب کو تشویشناک حالت میں ہسپتال منتقل کیا جارہا تھا کہ زخموں کی تاب نہ لاتے ہوئے راستے میں ہی دم توڑ گئی۔