موٹروے پولیس کا خصوصی اقدام، سینکڑوں ڈرائیورز کی بینائی کا مفت معائنہ

اسلام آباد( نامہ نگار خصوصی )نیشنل ہائی ویز اینڈ موٹروے پولیس نے ورلڈ سائٹ ڈے کے حوالے سے ایک نجی میڈیکل یونیورسٹی کے تعاون سے موٹروے ایم ٹو کے کلر کہار سروس ایریا میں مفت آئی کیمپ کا انعقاد کیا، جہاں سینکڑوں ڈرائیورز کی آنکھوں کا مفت معائنہ کیا گیا اور ڈرائیورز میں مفت عینکیں تقسیم کی گئیں۔ترجمان موٹروے پولیس کے
مطابق اس خصوصی اقدام کا مقصد ڈرائیورز کی بینائی کے مسائل کی بروقت نشاندہی، آنکھوں کی صحت سے متعلق آگاہی اور محفوظ ڈرائیونگ کے فروغ کے ذریعے ٹریفک حادثات کی روک تھام میں کردار ادا کرنا ہے۔ترجمان نے کہا کہ اچھی بینائی محفوظ ڈرائیونگ کی بنیادی ضرورت ہے، کیونکہ کمزور بینائی خصوصاً رات کے اوقات اور خراب موسم میں حادثات کے خطرات بڑھا سکتی ہے۔ ڈرائیورز کو چاہیے کہ وہ اپنی آنکھوں کا باقاعدگی سے معائنہ کروائیں۔ موٹروے پولیس ٹریفک قوانین کے نفاذ کے ساتھ ساتھ عوامی آگاہی اور روڈ سیفٹی کے فروغ کے لیے بھی اقدامات جاری رکھے ہوئے ہے۔