پٹرولیم مصنوعات کی قیمتوں کا معاملہ سینٹ میں پہنچ گیا

اسلام آباد (آئی این پی) سینٹ کی قائمہ کمیٹی برائے پٹرولیم نے کہا ہے پٹرولیم مصنوعات کی جب قیمت بڑھتی ہے تو 5 روپے روزانہ بڑھ جاتی ہے جبکہ محض چند پیسے کمی کیوں کی جاتی ہے۔ سنیٹر منظور احمد کی زیر صدارت اجلاس میں پٹرولیم مصنوعات کی قیمتوں کے تعین کے موجودہ طریقہ کار، روزانہ قیمتوں کا جائزہ لیا گیا۔ وزارت پٹرولیم اور اوگرا کے حکام نے بتایا کہ قیمتوں کا تعین اوگرا کی ذمہ داری ہے، عرب گلف کے ریٹس پر سات دن میں آنے والے کارگوز کی ایوریج نکالی جاتی ہے۔ ماضی میں ماہانہ جائزہ لیا جاتا تھا تاہم ایران، اسرائیل جنگ کے دوران روزانہ جائزہ لیا گیا۔ چیئرمین کمیٹی نے کہا جب ملک میں پٹرولیم مصنوعات کی کھیپ پہنچ رہی ہو اور ذخائر بھی وافر مقدار میں دستیاب ہوں تو قیمتوں میں محض چند پیسوں کی کمی کیوں کی جاتی ہے،5 روپے اضافہ اور صرف 75 پیسے کمی ہوتی ہے۔ حکام نے بتایا کہ وزیراعظم فیول سبسڈی کے تحت ایک کروڑ افراد کا اندراج ہو چکا اور تقریبا90 لاکھ افراد مستفید ہو چکے ہیں جبکہ9 ہزار700 فیول سٹیشنز یہ سہولت فراہم کر رہے ہیں۔