رواں سال صوبہ بھر سے ایک لاکھ سے زائد اشتہاری گرفتار

لاہور (کرائم رپورٹر) پنجاب پولیس نے سنگین جرائم میں مطلوب اشتہاری مجرمان، عدالتی مفروروں اور عادی مجرموں کے خلاف کریک ڈائون جاری رکھتے ہوئے رواں سال لاہور سمیت صوبہ بھر سے ایک لاکھ34 ہزار سے زائد اشتہاری مجرمان کو گرفتار کر لیا۔ ترجمان پنجاب پولیس کے مطابق گرفتار اشتہاری مجرمان میں اے کیٹگری کے31 ہزار382 جبکہ بی کیٹگری کے ایک لاکھ سے زائد ملزمان شامل ہیں۔ اسی طرح صوبہ بھر میں کارروائیوں کے دوران 43 ہزار سے زائد عدالتی مفروروں کو بھی گرفتار کیا گیا جن میں اے کیٹگری کے5 ہزار893 اور بی کیٹگری کے37 ہزار132 ملزمان شامل ہیں۔ ترجمان کے مطابق پنجاب پولیس نے رواں سال 18 ہزار 988 عادی مجرموں کو بھی گرفتار کیا۔ ان میں اے کیٹگری کے6 ہزار 373 جبکہ بی کیٹگری کے12 ہزار 615 عادی مجرم شامل ہیں۔ پنجاب پولیس کی کارروائیوں کے دوران صوبائی دارالحکومت لاہور میں32 ہزار527 اشتہاری مجرمان،13 ہزار247 عدالتی مفروروں اور6 ہزار77 عادی مجرموں کو گرفتار کیا گیا۔ آئی جی پنجاب عبدالکریم نے اشتہاری مجرمان، عدالتی مفروروں اور عادی مجرموں کی گرفتاری کے لیے موثر کارروائیاں کرنے والی پولیس ٹیموں کو شاباش دیتے ہوئے ہدایت کی ہے کہ مطلوب ملزمان کی گرفتاری کے لیے کریک ڈائون مزید موثر انداز میں جاری رکھا جائے۔