مغربی کنارے میںاسرائیلی آباد کاروں نے مسجد نذر آتش کر دی

رام اللہ (این این آئی) مقبوضہ مغربی کنارے کے گائوں مخماس میں اسرائیلی آبادکاروں نے ایک مسجد کو آگ لگا دی اور اس کی بیرونی دیواروں پر عبرانی زبان میں نعرے تحریر کیے، فلسطینی ذرائع اور اسرائیلی فوج نے واقعے کی تصدیق کی ہے، میڈیا رپورٹس کے مطابق یہ واقعہ گزشتہ روز پیش آیا جب مقامی رہائشیوں نے شیشے ٹوٹنے کی آواز سن کر مسجد کا رخ کیا۔ گائوں کے رہائشی عطا کنعان نے بتایا کہ مسجد میں شدید آگ لگی ہوئی تھی، تاہم مقامی نوجوانوں اور فائر بریگیڈ کی مدد سے آگ کو پوری عمارت میں پھیلنے سے روک لیا گیا۔ خبر کے مطابق آگ سے مسجد کے اندر بچھے قالین جل گئے اور دیواریں سیاہ ہوگئیں۔ آبادکاروں نے ایک گاڑی کو بھی نقصان پہنچایا اور عبرانی زبان میں نعرے لکھے۔ اسرائیلی فوج کے مطابق واقعے کی اطلاع ملنے پر اہلکاروں کو علاقے میں روانہ کیا گیا، تاہم کسی مشتبہ شخص کی شناخت نہیں ہوسکی اور تحقیقات شروع کر دی گئی ہیں۔ عطا کنعان کے مطابق گائوں کے رہائشیوں نے حالیہ ہفتوں میں آبادکاروں کے ممکنہ حملوں کے خدشے کے پیش نظر رات کے وقت پہرے داری کے لیے گروہ تشکیل دیئے ہیں۔ مخماس رام اللہ اور مغربی بیت المقدس کے درمیان واقع ہے جہاں قریبی اسرائیلی بستیوں کی چوکیوں سے آنے والے آبادکاروں کی جانب سے ماضی میں بھی حملوں کی اطلاعات سامنے آتی رہی ہیں۔