سعودی عرب اورجاپان خلائی تسخیر اوراس کی ٹیکنالوجیزکی ترقی میں شراکت داری کی توسیع میں سرگرم

ریاض(این این آئی)سعودی اسپیس ایجنسی اور جاپان ایرو اسپیس ایکسپلوریشن ایجنسی نے خلائی سرگرمیوں اور پر امن مقاصد کے لیے بیرونی خلا کے استعمال میں دونوں ملکوں کے درمیان شراکت داری کو فروغ دینے کی غرض سے تعاون کی ایک یادداشت پر دستخط کردیئے۔ اس کا مقصد سائنسی، تکنیکی اور صنعتی تعاون کے شعبوں کو وسعت دینا اور خلائی شعبے میں تحقیق و ترقی کی معاونت کرنا ہے۔یہ یاد داشت خلائی علوم، اس کی تسخیر اور اس کے اطلاق کے شعبوں کے احاطے کے ساتھ ساتھ خلائی ٹیکنالوجیز اور سروسز کی ترقی اور دونوں ملکوں میں صنعتی، تعلیمی اور تحقیقی اداروں کے درمیان تعاون کو مضبوط بنانے تک پھیلی ہوئی ہے۔تعاون کے شعبوں میں خلائی ماحول کا استعمال، خلا کے مختلف اطلاقات، خلائی نقل و حمل کے علاوہ سائنسی تحقیقات اور خلائی سرگرمیوں سے متعلق ٹیکنالوجیز کی ترقی شامل ہے۔