پی پی ایس سی نے پنجاب پولیس سمیت مختلف آسامیوں کی نتائج جاری کر دیئے

لاہور (این این آئی) پنجاب پبلک سروس کمیشن نے اسسٹنٹ رجسٹرار کو آپریٹو سوسائٹیز اور پنجاب پولیس میں اسسٹنٹ کی آسامیوں کے نتائج کا اعلان کر دیا۔ سیکرٹری پنجاب پبلک سروس کمیشن افضال احمد نے نتائج کے نوٹیفکیشنز جاری کر دیئے ہیں۔ ترجمان پنجاب پبلک سروس کمیشن کے مطابق محکمہ کوآپریٹوز میں لیڈی اسسٹنٹ رجسٹرار کوآپریٹو سوسائٹیز کی ایک آسامی کے لیے پانچ امیدوار تحریری امتحان میں کامیابی کے بعد نفسیاتی جائزے اور انٹرویو کے لیے عارضی طور پر اہل قرار پائے ہیں۔ اسی طرح اسسٹنٹ رجسٹرار کوآپریٹو سوسائٹیز کی 29 آسامیوں کے لیے 131 امیدوار تحریری امتحان میں کامیاب ہوئے ہیں۔ محکمہ مال کے تحت ڈپٹی کمشنر اور ڈسٹرکٹ کلکٹر آفس لاہور میں جونیئر کلرک کی 60 آسامیوں کے لیے تحریری، ٹائپنگ کے امتحان میں مجموعی طور پر 151 امیدوار انٹرویو کے لیے عارضی طور پر کامیاب قرار پائے ہیں۔ پنجاب پبلک سروس کمیشن نے محکمہ پولیس میں اسسٹنٹ کی 48 آسامیوں کا حتمی نتیجہ بھی جاری کر دیا ہے اور تمام 48 آسامیوں پر امیدواروں کی تقرری کے لیے سفارش کر دی گئی ہے پنجاب پبلک سروس کمیشن کے مطابق تحریری نتائج میں کامیاب قرار پانے والے امیدواروں کے نفسیاتی جائزے اور انٹرویو کے لیے کال لیٹرز کمیشن کی ویب سائٹ پر اپ لوڈ کیے جائیں گے، جبکہ امیدواروں کو ایس ایم ایس اور ای میل کے ذریعے بھی آگاہ کیا جائے گا۔ امیدواروں کے لیے ضروری ہے کہ وہ انٹرویو کے وقت اپنی اصل تعلیمی اسناد اور دیگر متعلقہ دستاویزات ہمراہ لائیں۔ نتائج اور متعلقہ معلومات پنجاب پبلک سروس کمیشن کی ویب سائٹ پر بھی دستیاب ہے۔