بچوں کی فلاح و بہبود والدین کے ترجیحی حق سے زیادہ اہم،لاہور ہائیکورٹ

لاہور (کورٹ رپورٹر) لاہور ہائیکورٹ نے بچوں کی حوالگی سے متعلق والد کی آئینی درخواست مسترد کرتے ہوئے قرار دیا ہے کہ بچوں کی فلاح و بہبود والدین کے ترجیحی حق سے زیادہ اہم ہے۔ جسٹس شیریں عمران نے 9 صفحات پر مشتمل تحریری فیصلے میں والد کو فی بچہ 35 ہزار روپے ماہانہ خرچہ ادا کرنے اور اس میں ہر سال 10 فیصد اضافے کا حکم برقرار رکھا ہے۔ عدالت نے قرار دیا کہ والد مالی مشکلات یا بیروزگاری کا عذر پیش کرکے بچوں کے اخراجات کی ذمہ داری سے بری الذمہ نہیں ہوسکتا۔ بچوں کی حوالگی کا فیصلہ کرتے وقت ان کی تعلیم، نگہداشت، عمر اور خواہش کو مدنظر رکھنا ضروری ہے، جبکہ ان کی فلاح و بہبود میں مالی ضروریات کے ساتھ جذباتی، نفسیاتی اور تعلیمی ضروریات بھی شامل ہیں۔ فیصلے کے مطابق دونوں بچے اپنی والدہ کے ساتھ رہ رہے ہیں اور والد انہیں والدہ سے منتقل کرنے کے حق میں کوئی ٹھوس ثبوت پیش نہیں کرسکا۔ بچے نجی اسکول میں زیرتعلیم ہیں اور انہوں نے عدالت میں والدہ کے ساتھ رہنے کی خواہش کا اظہار بھی کیا۔ عدالت نے قرار دیا کہ بچوں کی رائے کو اہمیت دی جانی چاہیے، تاہم اسے حتمی فیصلہ بنانے کے بجائے مجموعی حالات کے تناظر میں دیکھا جائے۔ گارڈینز اینڈ وارڈز ایکٹ کی دفعہ 17 کے تحت بچوں کی فلاح و بہبود بنیادی اہمیت رکھتی ہے اور کسی بھی والدین کا ترجیحی حق بچوں کی بہتری پر فوقیت نہیں رکھتا۔ عدالت نے قرار دیا کہ ماتحت عدالتوں کے فیصلوں میں کوئی قانونی خامی یا شواہد کی غلط تشریح ثابت نہیں ہوئی۔ والد کی درخواست مسترد کرتے ہوئے بچوں سے ملاقات کا پہلے سے طے شدہ شیڈول برقرار رکھا گیا۔