راجن پور تیز رفتار بس ڈیوائیڈر سے ٹکرا کر الٹ گئی 10 مسافر جان بحق 38 سے زائد زخمی

راجن پور، روجھان (نمائندگان خبریں) انڈس ہائی وے پر تیز رفتار مسافر بس حادثے کا شکار ہوگئی جس کے نتیجے میںخواتین اوربچوں سمیت 10 افراد جاں بحقجبکہ 38 زخمی ہوگئے ۔ ڈسٹرکٹ ہسپتال میں ایمرجنسی نافذ کردی گئی جبکہ وزیر اعلیٰ پنجاب مریم نواز نے حادثے پر اظہار افسوس کرتے ہوئے رپورٹ طلب کرلی ۔ بنگلہ ہدایت کے قریب کراچی سے ڈیرہ غازی خان جانے والی عادل شاہ ٹرانسپورٹ کمپنی کی مسافر بس حادثے کا شکار ہو گئی، جس کے نتیجے میں 10 افراد موقع پر جاں بحق جبکہ 38 مسافر زخمی ہو گئے۔ ابتدائی رپورٹ کے مطابق بس تیز رفتاری کے باعث زیرِ تعمیر سڑک کے ڈیوائیڈر سے ٹکرا کر الٹ گئی۔ ریسکیو 1122 نے امدادی کارروائیاں کرتے ہوئے زخمیوں کو ابتدائی طبی امداد کے بعد ڈسٹرکٹ ہیڈ کوارٹر ہسپتال راجن پور منتقل کر دیا۔حادثے میں جاں بحق ہونے والوں میں مریم بی بی (25)، ثروہ رشید (4)، رشید احمد (45)، محمد آصف (35)، محمد کاشف (30)، لال ناز (75)، محمد رستم (26)، عبدالمنان (30)، محمد طارق (40) اور شوکت (45) شامل ہیں، جن کا تعلق تونسہ شریف، وہوا، ملتان، کوٹ چھٹہ، ڈیرہ غازی خان اور ڈیرہ اسماعیل خان سے بتایا گیا ہے۔حادثے کی اطلاع ملتے ہی ڈپٹی کمشنر عمران حسین رانجھا اور ڈی پی اومرزا محمد عمران بیگ جائے حادثہ پر پہنچ گئے اور ریسکیو آپریشن کا جائزہ لیا۔ ڈپٹی کمشنر نے ڈی ایچ کیو ہسپتال راجن پور میں ایمرجنسی نافذ کرنے اور ایم ایس کو زخمیوں کے بہترین علاج معالجے کی ہدایت کی۔ادھر وزیر اعلیٰ پنجاب مریم نواز شریف نے حادثے پر اظہار افسوس کرتے ہوئے ڈپٹی کمشنر سے رپورٹ طلب کرلی۔
بس حادثہ
راجن پور: حادثے کا شکار بس الٹی ہوئی ہے جبکہ ریسکیو اہلکار امدادی کاموں میں مصروف ہیں۔