لاہور ہائیکورٹ:قتل کی پیشگی منصوبہ بندی ثابت نہ ہونے پر ملزم کی عمرقید کی سزا ختم

لاہور (کورٹ رپورٹر) لاہور ہائیکورٹ کےجسٹس محمد امجد رفیق نے قتل کی پیشگی منصوبہ بندی ثابت نہ ہونے پر ملزم کی عمر قید کی سزا ختم کر دی۔ عدالتی فیصلے کے مطابق پنجاب سینٹینسنگ ایکٹ 2019 کا اطلاق ایسے مقدمات پر نہیں ہوتا جن میں سزائے موت مقرر ہو۔ لاہور ہائیکورٹ کی حکومت پنجاب کو قتل کے مقدمات میں سزا کے تعین سے متعلق قانونی اصلاحات پر غور کرنے کا حکم دیا ہے۔ عدالت نے ہدایت کی کہ پنجاب سینٹینسنگ ایکٹ میں عدالتی صوابدید کی گنجائش پیدا کرنے کے لیے ترامیم کی جائیں، سزا مقرر کرنے سے پہلے ملزم کو الگ سماعت کا موقع دینے کی اہمیت پر بھی زور دیا گیا ہے۔ عدالتی فیصلے کے مطابق لاہور ہائیکورٹ نے ملزم کی سزا دفعہ 302 ب سے تبدیل کرکے دفعہ 302 (سی) تعزیرات پاکستان کے تحت کر دی۔ عدالت نے ملزم کی سزا پہلے سے کاٹی گئی قید کی مدت تک محدود کر دی۔ عدالتی فیصلے کے مطابق ملزم 12 سال، 11 ماہ اور 2 دن قید کاٹ چکا ہے، عدالتی جسٹس محمد امجد رفیق نے ملزم کی جیل اپیل جزوی طور پر منظور کرلی۔ فیصلے میں لکھا ہے کہ قتل کی باقاعدہ سازش یا پیشگی منصوبہ بندی کے ٹھوس شواہد نہیں ملے، لڑکوں کے دو گروپوں میں رقابت کی بنیاد پر قتل کو پہلے سے طے شدہ منصوبہ قرار نہیں دیا جاسکتا، ملزم نے اچانک تصادم کے دوران ہاکی کا ایک وار کیا چشم دید گواہوں کی شہادت طبی شواہد سے مطابقت رکھتی ہے، مقتول کے سر پر ہاکی کا وار جان لیوا ثابت ہوا۔ لاہور ہائیکورٹ نے مقتول کے ورثا کو 5 لاکھ روپے معاوضہ ادا کرنے کا حکم برقرار رکھا۔ معاوضہ ادا نہ کرنے کی صورت میں ملزم کو مزید6 ماہ قید کاٹنا ہوگی، ہائیکورٹ نے سزا میں ترمیم کرتے ہوئے ٹرائل کورٹ کا ریکارڈ واپس بھجوانے کا حکم دے دیا۔