مشرقِ وسطیٰ میں کشیدگی، سردیوں میں ایل این جی سپلائی مزید سکڑنے کا خدشہ

کراچی (این این آئی) مشرقِ وسطیٰ میں کشیدگی کے باعث سردیوں میں مائع قدرتی گیس (ایل این جی) کی سپلائی مزید محدود ہونے کا خدشہ پیدا ہوگیا ہے جبکہ حکومت عالمی منڈی سے مہنگے ایل این جی سپاٹ کارگوز خریدنے سے گریزاں ہے۔ نومبر سے فروری تک ایل این جی کی درآمد پر تقریباً دو ارب ڈالر خرچ ہونے کا تخمینہ ہے، تاہم درآمدی منصوبہ تاحال منظوری کا منتظر ہے۔ ذرائع کے مطابق پٹرولیم ڈویژن نے سردیوں میں گیس کی ضروریات پوری کرنے کے لیے امریکا، آذربائیجان اور دیگر ممالک سے ایل این جی کے 22 کارگوز درآمد کرنے کی منظوری طلب کی تھی۔ اس کے علاوہ 7 سے 10 اکتوبر کے دوران ہنگامی بنیادوں پر 12 کارگوز منگوانے کی اجازت بھی مانگی گئی، تاہم منظوری نہ مل سکی۔ رپورٹ کے مطابق قطر میں علاقائی کشیدگی کے باعث ایل این جی سپلائی معاہدوں پر عمل درآمد روکنے کی مدت نومبر تک بڑھا دی گئی ہے۔