ای سپورٹس نوجوانوں کیلئے ترقی، پاکستان کی پہچان بنے گا: صوبائی وزیر کھیل

لاہور(سپورٹس رپورٹر)صوبائی وزیر کھیل ملک فیصل ایوب کھوکھر نے پاکستان میں پہلی مرتبہ عالمی پب جی موبائل (PUBG MOBILE) ای سپورٹس ایونٹ کے انعقاد کو خوش آئند قرار دیتے ہوئے کہا ہے کہ 32 ممالک کی ٹیموں کی شرکت پاکستان کے لیے ایک بڑا اعزاز اور ملک کی ابھرتی ہوئی ای سپورٹس انڈسٹری کے لیے اہم سنگ میل ہے۔ اس عالمی ایونٹ سے پاکستان کی بین الاقوامی سطح پر پہچان مزید مستحکم ہوگی اور پاکستانی نوجوانوں کو اپنی صلاحیتوں کے اظہار کے لیے نئے مواقع میسر آئیں گے۔ لاہور کے ایک نجی ہوٹل میں ہونیوالے منفرد ایونٹ میں صوبائی وزیر کھیل ملک فیصل ایوب کھوکھر نے بطور مہمانِ خصوصی شرکت کی اور اپنے خطاب میں ای سپورٹس کی بڑھتی ہوئی اہمیت، نوجوانوں کے لیے اس کے وسیع امکانات اور ڈیجیٹل کھیلوں کے فروغ کی ضرورت پر زور دیا۔ صوبائی وزیر نے کہا کہ موجودہ دور میں ای سپورٹس محض تفریح نہیں بلکہ ایک باقاعدہ عالمی صنعت اور نوجوانوں کے لیے ترقی کے نئے امکانات کا شعبہ بن چکی ہے۔ دنیا بھر میں ای سپورٹس کو تیزی سے فروغ مل رہا ہے اور پاکستان کے باصلاحیت نوجوانوں میں بھی اس شعبے میں آگے بڑھنے کی بھرپور صلاحیت موجود ہے۔ انہوں نے کہا کہ پاکستان میں عالمی ای سپورٹس ایونٹ کا انعقاد اس بات کا ثبوت ہے کہ ہمارا ملک بین الاقوامی کھیلوں اور ڈیجیٹل مقابلوں کی میزبانی کی صلاحیت رکھتا ہے۔ 32 ممالک کی ٹیموں کی شرکت پاکستان کے لیے عالمی برادری کے ساتھ کھیلوں کے روابط مضبوط بنانے اور ملک کے مثبت تشخص کو اجاگر کرنے کا بہترین موقع ہے۔ ملک فیصل ایوب نے کہا کہ وزیراعلی پنجاب مریم نواز شریف کی قیادت میں نوجوانوں کو کھیلوں کے زیادہ سے زیادہ مواقع فراہم کرنا اور ان کی صلاحیتوں کو نکھارنا حکومت کی ترجیحات میں شامل ہے۔ روایتی کھیلوں کے ساتھ ساتھ جدید ڈیجیٹل کھیلوں اور ای سپورٹس کی ترقی پر توجہ دینا وقت کی اہم ضرورت ہے۔ انہوں نے مزید کہا کہ ای سپورٹس نوجوانوں میں ذہنی صلاحیتوں، حکمت عملی، فیصلہ سازی، نظم و ضبط اور ٹیم ورک کو فروغ دینے میں اہم کردار ادا کر سکتی ہے۔ اس شعبے سے گیمنگ، سافٹ ویئر ڈویلپمنٹ، ڈیجیٹل مارکیٹنگ، ایونٹ مینجمنٹ اور دیگر متعلقہ شعبوں میں روزگار اور کاروبار کے نئے مواقع بھی پیدا ہو سکتے ہیں۔ صوبائی وزیر نے کہا کہ پاکستان کے نوجوان ٹیکنالوجی اور ڈیجیٹل دنیا میں اپنی صلاحیتوں کا لوہا منوانے کی بھرپور اہلیcت رکھتے ہیں۔ ضرورت اس امر کی ہے کہ انہیں جدید سہولیات، تربیت اور بین الاقوامی سطح پر مقابلے کے مواقع فراہم کیے جائیں تاکہ وہ اپنی صلاحیتوں کو مثبت انداز میں بروئے کار لاتے ہوئے ملک کا نام روشن کر سکیں۔