فیصل آباد میں مبینہ پولیس مقابلے میں ریکارڈ یافتہ ڈاکو عمیری ہلاک، تین ساتھی فرار

مکوآنہ (این این آئی) فیصل آباد تھانہ صدر جڑانوالہ کے علاقے 71 گربانہ کے قریب مبینہ پولیس مقابلے کے دوران بین الاضلاعی ڈکیت گینگ کا ریکارڈ یافتہ ملزم عمیر عرف عمیری ہلاک ہو گیا جبکہ اس کے تین ساتھی فرار ہونے میں کامیاب ہو گئے۔ پولیس ذرائع کے مطابق دو موٹر سائیکلوں پر سوار چار مسلح ڈاکوئوں نے اسلحے کے زور پر ایک شہری سے رقم چھینی اور فرار ہو گئے۔ واقعے کی اطلاع ملنے پر ایس ایچ او تھانہ کھرڑیانوالہ سب انسپکٹر عاطف کھچی پولیس نفری کے ہمراہ ملزمان کے تعاقب میں روانہ ہوئے۔ پولیس نے تعاقب کرتے ہوئے تھانہ صدر جڑانوالہ کی حدود میں 71 گربانہ کے قریب مبینہ ڈاکوں کو گھیر لیا۔ اطلاع ملنے پر ایس ایچ او تھانہ صدر جڑانوالہ سب انسپکٹر ملک عمران بھی پولیس ٹیم کے ہمراہ موقع پر پہنچ گئے۔ پولیس ذرائع کے مطابق اس دوران دونوں جانب سے فائرنگ کا تبادلہ ہوا، جس کے بعد ایک ملزم زخمی حالت میں گرفتار کر لیا گیا جبکہ اس کے دیگر تین ساتھی فرار ہو گئے۔ زخمی ملزم کو فوری طور پر ہسپتال منتقل کیا گیا تاہم وہ زخموں کی تاب نہ لاتے ہوئے دم توڑ گیا۔ پولیس ذرائع کے مطابق ہلاک ہونے والے ملزم کی شناخت 76 رب رسول پور کے رہائشی عمیر عرف عمیری کے نام سے ہوئی ہے۔