رائیونڈ میں عطائی ڈاکٹروں کا راج، گلی محلوں میں غیر قانونی کلینکس قائم

رائیونڈ (این این آئی) رائیونڈ میں مین شاہراہوں پر قائم میڈیکل سٹورز اور کلینکس کے خلاف محکمہ صحت کی کارروائی کے بعد عطائی ڈاکٹروں نے گلی محلوں کا رخ کر لی، جہاں وہ انسانی زندگیوں سے کھل کر کھیل رہے ہیں۔ تفصیلات کے مطابق ضلعی انتظامیہ اور ہیلتھ کیئر کمیشن کی جانب سے مین روڈ پر کارروائی کے بعد اب عطائی ڈاکٹروں نے رائیونڈ کے گنجان آباد علاقوں میں اپنے غیر قانونی کلینک اور میڈیکل سٹور قائم کر لیے ہیں۔ ذرائع کے مطابق یہ عطائی نہ صرف بغیر کسی ڈگری کے مریضوں کا علاج کر رہے ہیں بلکہ ناقص اور غیر معیاری ادویات بھی فروخت کر رہے ہیں۔ روزانہ سینکڑوں سادہ لوح شہری ان کے جھانسے میں آ کر اپنی قیمتی رقم اور صحت دونوں گنوا رہے ہیں۔ عطائی ڈاکٹروں کی فیس 500سے 1500روپے تک وصول کی جارہی ہے جبکہ ایکسپائری ادویات بھی دھڑلے سے دی جا رہی ہیں۔ اہل علاقہ کا کہنا ہے کہ ان عطائیوں کی وجہ سے کئی افراد اپنی جان سے ہاتھ دھو بیٹھے ہیں جبکہ کئی غلط علاج کے باعث معذور ہو چکے ہیں۔ شہریوں اور سماجی حلقوں نے سیکرٹری صحت پنجاب، سی ای او ہیلتھ لاہور اور اسسٹنٹ کمشنر رائے ونڈ سے فوری نوٹس لے کر ان گلی محلوں میں قائم عطائیوں کے اڈوں کے خلاف بھرپور آپریشن کا مطالبہ کیا ہے۔