پاکستان اور چین کے درمیان سوست خنجراب سرحدپرزرعی اور متعلقہ مصنوعات کیلئے گرین چینل فعال کرنے کے معاہدیپ پر دستخط

اسلام آباد (این این آئی) پاکستان اور چین کیکسٹمز انتظامیہ کے درمیان سوستـخنجراب سرحد پر زرعی اور متعلقہ مصنوعات کے لیے گرین چینل کو فعال کرنے کے معاہدے پر فیڈرل بورڈ آف ریونیو (ایف بی آر) ہیڈکوارٹرز، اسلام آباد میں منعقدہ آن لائن تقریب کے دوران دستخط کیے گئے۔ یہ معاہدہ دونوں ممالک کے درمیان دوطرفہ تجارت کو سہل بنانے کی جانب ایک اہم پیش رفت ہے۔پاکستانی وفد کی سربراہی ممبر (کسٹمز آپریشنز) سید شکیل شاہ نے کی۔ وفد میں چیف کلکٹر کسٹمز پشاور، کلکٹر کسٹمز گلگت بلتستان، محکمہ تحفظِ نباتات، نیفسا ، پاکستان سنگل ونڈو اور وزارتِ تجارت کے نمائندگان، نیز چین میں پاکستانی سفارت خانے کے کمرشل قونصلر شامل تھے۔چینی وفد کی سربراہی لی چنگوا نے کی، جو ارومچی کسٹمز کی ڈپٹی ہیڈ اور تاشقورغان کسٹمز کی ڈائریکٹر ہیں۔معاہدے کا مقصد دونوں ممالک کے درمیان باہمی طور پر متفقہ فہرست میں شامل زرعی مصنوعات کی تجارت کے لیے گرین چینل قائم کرنا ہے۔ اس انتظام کے تحت پاکستان اور چین کی کسٹمز انتظامیہ اہل کھیپوں کی ترجیحی بنیادوں پر پراسیسنگ اور جانچ کو یقینی بنائے گی، جبکہ کسٹمز نگرانی کو مؤثر بنانے کے لیے خطرات کی بنیاد پر کنٹرولز نافذ کیے جائیں گے۔ معاہدے میں دونوں ممالک کی کسٹمز انتظامیہ کے درمیان معلومات اور خطرات سے متعلق انتباہات کے تبادلے کو مزید مؤثر بنانے کی شق بھی شامل ہے تاکہ باہمی رابطہ کاری کو مضبوط اور سرحد پار تجارت کے انتظام کو بہتر بنایا جاسکے۔ زرعی تجارت میں وقت کی اہمیت کے پیشِ نظر، معاہدے کے تحت جلد خراب ہونے والی اشیاء پر مشتمل کھیپوں کو ترجیحی بنیادوں پر نمٹانے کا بھی انتظام کیا گیا ہے تاکہ تاخیر کو کم سے کم کرتے ہوئے ان کی سرحد پار بروقت نقل و حرکت کو یقینی بنایا جا سکے۔تقریب کا اختتام معاہدے پر دستخط اور دونوں وفود کے سربراہان کے اختتامی کلمات کے ساتھ ہوا۔