فراز گرئوانڈ بھگدڑ کیس: مسٹر پتلو سمیت 9 افراد نامزد، 6 گرفتار

سیالکوٹ(مانیٹرنگ ڈیسک)ڈسکہ روڈ پر واقع فراز کرکٹ گرانڈ میں ٹک ٹاکر انصر محمود عرف مسٹر پتلو کی شادی کی تقریب کے دوران پیش آنے والے بھگدڑ کے افسوسناک واقعے پر سیالکوٹ پولیس نے سخت قانونی کارروائی کرتے ہوئے مسٹر پتلو سمیت 9 افراد کو نامزد کر دیا، جبکہ 40 سے 45 نامعلوم سکیورٹی گارڈز کو بھی مقدمے میں شامل کر لیا گیا ہے۔ پولیس نے کارروائی کرتے ہوئے 6 ملزمان کو گرفتار کر لیا ہے، جبکہ دیگر کی گرفتاری کے لیے مختلف مقامات پر چھاپے مارے جا رہے ہیں۔پولیس کے مطابق تھانہ موترہ میں ایس ایچ او انسپکٹر مبین احمد چیمہ کی مدعیت میں مقدمہ نمبر 1335/26 درج کیا گیا ہے۔ مقدمے میں انصر محمود عرف مسٹر پتلو، کاشف، گرئوانڈ کے مالک ودیگرکو نامزد کیا گیا ہے۔ ملزمان کے خلاف تعزیراتِ پاکستان کی دفعات 322، 431، 440، 188، 109، 148، 149 اور 16 ایم پی او کے تحت مقدمہ درج کر کے تفتیش شروع کر دی گئی ہے۔پولیس کی ابتدائی تحقیقات کے مطابق منتظمین نے سوشل میڈیا پر موٹر سائیکل، کار اور دیگر قیمتی انعامات کی قرعہ اندازی کا اعلان کر کے ہزاروں افراد کو تقریب میں مدعو کیا۔ تقریب کے دوران لاڈ اسپیکر پر شرکا کو بیک وقت گرانڈ میں داخل ہونے کا اعلان کیا گیا، جس کے نتیجے میں شدید بھگدڑ مچ گئی۔ پولیس کے مطابق منتظمین نے اجازت نامے کی شرائط اور حفاظتی ایس او پیز کی خلاف ورزی کی، جبکہ واقعے کے باعث مین ڈسکہ روڈ پر ٹریفک شدید متاثر ہوئی اور ہنگامہ آرائی کے دوران شہریوں کی املاک کو بھی نقصان پہنچا۔واقعے کی اطلاع ملتے ہی ڈی پی او سیالکوٹ کیپٹن (ر) دوست محمد موقع پر پہنچ گئے اور پولیس و ریسکیو 1122 کی امدادی کارروائیوں کی خود نگرانی کی۔ پولیس نے زخمیوں کو فوری طور پر ہسپتال منتقل کیا، ایمبولینسز کے لیے راستے کلیئر کروائے اور ٹریفک کی روانی بحال کرائی۔پولیس کے مطابق اس افسوسناک واقعے میں عقیل ولد بشیر احمد جاں بحق جبکہ 18 افراد زخمی ہوئے۔ تمام زخمیوں کو طبی امداد فراہم کرنے کے بعد ہسپتالوں سے ڈسچارج کر دیا گیا ہے۔ڈی پی او سیالکوٹ کیپٹن(ر)دوست محمد نے کہا کہ شہریوں کی جان و مال کا تحفظ پولیس کی اولین ذمہ داری ہے۔ عوامی اجتماعات میں حفاظتی انتظامات سے غفلت یا انسانی جانوں کو خطرے میں ڈالنے والوں کے ساتھ کوئی رعایت نہیں برتی جائے گی۔ انہوں نے کہا کہ مقدمے کی تفتیش میرٹ پر مکمل کر کے تمام ذمہ داران کو قانون کے مطابق انجام تک پہنچایا جائے گا۔