واشنگٹن (این این آئی)امریکی ریاست مسیسیپی میں ڈیموکریٹ امیدوار اسکاٹ کولم نے ری پبلکنز کا دہائیوں پرانا
انتخابی راج ختم کرتے ہوئے سینیٹ کی نشست جیت لی وہ 140 سال سے زائد عرصے بعد اس ریاست سے منتخب ہونے والے پہلے سیاہ فام سینیٹر بن گئے۔امریکی میڈیا کے مطابق اسکاٹ کولم نے انتہائی سخت مقابلے میں ری پبلکن امیدوار اور موجودہ سینیٹر سنڈی ہائیڈ اسمتھ کو شکست دی۔ نتائج کے مطابق کولم نے 49.2 فیصد ووٹ حاصل کیے جبکہ ان کی حریف 48.7 فیصد ووٹ لے سکیں، آزاد امیدوار کے حصے میں 2.1 فیصد ووٹ آئے۔یہ کامیابی اس لیے بھی غیر معمولی ہے کہ مسیسیپی میں 1982 سے مسلسل ری پبلکن امیدوار کامیاب ہوتے آرہے تھے، جبکہ صدر ڈونلڈ ٹرمپ نے بھی 2024 کے صدارتی انتخاب میں یہ ریاست 22 فیصد سے زائد فرق سے جیتی تھی۔شکست تسلیم کرتے ہوئے سنڈی ہائیڈ اسمتھ نے سوشل میڈیا پر جاری ویڈیو پیغام میں اسکاٹ کولم کو مبارک باد دی اور کہا کہ اگرچہ یہ وہ نتیجہ نہیں جس کی انہیں امید تھی، تاہم وہ ریاست کے عوام کے فیصلے کا احترام کرتی ہیں۔ریاست کے دارالحکومت جیکسن میں نیشنل ایسوسی ایشن فار دی ایڈوانسمنٹ آف کلرڈ پیپل کے دفتر میں کولم کی کامیابی کا اعلان ہوتے ہی کارکنوں نے خوشی کا اظہار کیا۔
امریکا کی ری پبلکن ریاست میں بڑا سیاسی اپ سیٹ، 140 سال بعد پہلی بار سیاہ فام سینیٹر منتخب
