اسلام آباد (این این آئی) امریکہ، چین و اقوام متحدہ میں پاکستان کے سابق سفیر اور آزاد جموں و کشمیر کے سابق
صدر سردار مسعود خان نے کہا ہے کہ پاکستان کو اپنی سفارتی کامیابیوں کو مستحکم کرنے، متوازن اور کثیرالجہتی خارجہ پالیسی اپنانے، قومی سلامتی کے مفادات کا تحفظ کرنے اور معیشت میں فوری اصلاحات کے ذریعے اپنی تزویراتی اہمیت کو پائیدار قومی طاقت میں تبدیل کرنے کی ضرورت ہے۔علاقائی سلامتی اور بدلتے ہوئے عالمی نظام کے حوالے سے ایک انٹرویو میں سردار مسعود خان نے کہا کہ امریکہ اور اسرائیل کی جانب سے ایران کے خلاف فوجی تیاریوں کا سلسلہ جاری رہنے کے باوجود امریکی سیاست میں ایک اور جنگ کے لیے حمایت کم ہوئی ہے۔ ان کے مطابق وسط مدتی انتخابات میں ری پبلکن پارٹی کو دھچکے، داخلی معاشی دباؤ، جنگ کے اخراجات پر عوامی بے اطمینانی اور سیاسی مخالفت میں اضافے نے سفارت کاری کے امکانات کو تقویت دی ہے۔ پاکستان، قطر اور عمان سفارتی رابطوں میں سہولت کاری کر رہے ہیں، جبکہ چین بھی جنگی کشیدگی کے خاتمے کے لیے کوششیں جاری رکھے ہوئے ہے۔چین کے کردار پر بات کرتے ہوئے انہوں نے کہا کہ بیجنگ محتاط سفارتی حکمت عملی اختیار کیے ہوئے ہے اور پاکستان اور چین کے پانچ نکاتی تجاویز میں طے کردہ اصولوں کی حمایت کر رہا ہے، جن میں جنگ بندی، مذاکرات، شہری تنصیبات کا تحفظ، آزادانہ بحری آمدورفت اور اقوام متحدہ کے منشور کی پاسداری شامل ہیں۔ انہوں نے کہا کہ ابھرتا ہوا عالمی نظام کثیر قطبی شکل اختیار کر رہا ہے، جس میں امریکہ، چین، گلوبل ساؤتھ اور پاکستان، ترکیہ اور انڈونیشیا سمیت ابھرتی ہوئی درمیانی طاقتیں اہم کردار ادا کر رہی ہیں۔
علاقائی سلامتی اور معاشی اصلاحات میں توازن ناگزیر ہے، سردار مسعود خان
