کاہنہ، فارم ہائوس پر شیرنی کے حملے میں 19 سالہ نوجوان جاں بحق

لاہور (کرائم رپورٹر) کاہنہ کے علاقے میں فارم ہائوس پر شیرنی کے حملے میں 19 سالہ نوجوان جاں بحق ہوگیا، پولیس نے واقعے کے بعد فارمہائوس مالک فیاض عرف فیضی اور ٹک ٹاکر نعمان کو گرفتار کرلیا۔ ترجمان ڈی آئی جی آپریشنز کے مطابق ٹک ٹاکر نعمان ویڈیو بنانے کے لیے فارم ہائوس پہنچا تھا، جہاں شیرنی اچانک قابو سے باہر ہوگئی اور فارم کے ملازم 19 سالہ طلحہ پر حملہ کر دیا، جس کے نتیجے میں نوجوان شدید زخمی ہوگیا۔ زخمی کو فوری طور پر علاج کے لیے نجی ہسپتال منتقل کیا گیا، تاہم وہ جانبر نہ ہوسکا۔ متوفی کی لاش پوسٹمارٹم کے لیے مردہ خانے منتقل کر دی گئی ہے اس دوران ملزمان میں واقعے کی حقیقت چھپانے کے لیے شیرنی کے حملے کو کتے کا حملہ ظاہر کرنے کی کوشش کی گئی، تاہم مشکوک صورتحال کی جانچ پڑتال کے دوران شیرنی کے حملے کا انکشاف ہوا جس پر حملہ آور شیرنی کو فارم ہائوس سے تحویل میں لے کر وائلڈ لائف حکام کے حوالے کر دیا گیا ہے، جبکہ واقعے کا مقدمہ درج کرکے ملزمان کو گرفتار کرلیا، پولیس حکام کا کہنا ہے کہ شیرنی رکھنے کے اجازت نامے، فارم ہائوس میں حفاظتی انتظامات اور ممکنہ غفلت کے تمام پہلوئوں کی تحقیقات کی جا رہی ہیں۔ اس حوالے سے ڈی آئی جی آپریشنز فیصل کامران کا کہنا ہے کہ ٹک ٹاک کا شوق کسی انسانی جان سے بڑھ کر نہیں ہوسکتا۔ واقعے کی حقیقت چھپانے کی کوشش کی گئی، غفلت کے تمام پہلووں کی مکمل تحقیقات ہوں گی اور ذمہ داروں کے خلاف قانون کے مطابق کارروائی کی جائے گی۔