امریکا اور چین کا تعلقات میں استحکام برقرار رکھنے پر اتفاق

واشنگٹن (این این آئی)امریکی وزیرِ خارجہ مارکو روبیو اور چینی وزیرِ خارجہ وانگ ای کے درمیان ٹیلیفون پر گفتگو ہوئی جس میں دونوں ممالک کے تعلقات کو باہمی احترام، انصاف اور دوطرفہ تعاون کی بنیاد پر برقرار رکھنے پر اتفاق کیا گیا۔امریکی محکمہ خارجہ کے مطابق دونوں رہنمائوں نے امن کے قیام اور جوہری ہتھیاروں کے خاتمے کے لیے بامقصد مذاکرات کو ضروری قرار دیا۔گفتگو میں امریکی صدر ڈونلڈ ٹرمپ کی آئندہ ہفتے چین میں ہونے والے ایشیا پیسیفک اقتصادی تعاون اجلاس میں شرکت اور دسمبر میں فلوریڈا میں ہونے والے جی 20 سربراہی اجلاس میں چینی صدر شی جن پنگ کی شرکت پر بھی تبادلہ خیال کیا گیا۔امریکی محکمہ خارجہ نے اجلاس کے موقع پر امریکی، چینی اور روسی صدور کی ممکنہ سہ فریقی ملاقات کا امکان بھی ظاہر کیا۔خبر ایجنسی کے مطابق مارکو روبیو نے گزشتہ روز بھی تینوں صدور کی ممکنہ ملاقات کا ذکر کیا تھا۔چینی وزارتِ خارجہ کے مطابق دونوں وزرائے خارجہ کے درمیان گفتگو مثبت اور تعمیری ماحول میں ہوئی۔ اس موقع پر وانگ ای نے کہا کہ چین اور امریکا کے تعلقات میں استحکام برقرار رکھنا مشترکہ مفادات کے لیے دانشمندانہ انتخاب ہے۔انہوں نے مزید کہا کہ چین کی امریکا سے متعلق پالیسی مستقل اور واضح ہے، چین امریکا کے ساتھ رابطے اور تعاون مزید مضبوط بنانے کا خواہاں ہے، دونوں ممالک کو اختلافات اور حساس معاملات مناسب طریقے سے حل کرنے چاہئیں۔