راولپنڈی(خصوصی رپورٹر)تھانہ نیوٹان کے علاقے میں راولپنڈی کی مرکزی شاہراہ مری روڈ پر تیز رفتار گاڑی نے سڑک عبور کرنے والی دو نوجوان لڑکیوں کو کچل دیا۔ حادثے میں دونوں لڑکیاں موقع پر جاں بحق ہوگئیں۔ دونوں لڑکیاں ہونے والی نند بھاوج تھیں اطلاعات کے مطابق جمعہ کی علی الصبح دونوں لڑکیاں رحمان آباد کے قریب نادرا بلڈنگ میں واقع پرائیویٹ آفس سے چھٹی کے بعد گھر جانے کے لئے نکلیں کہ مری روڈ عبور کرتے ہوئے صدر کی جانب سے آنے والی تیز رفتار کار نے دونوں کو کچل دیا جس کے نتیجے میں 22 سالہ ثنا سلیم موقع پر ہی دم توڑ گئی، جبکہ شدید زخمی 23 سالہ منشا خالد کو ہسپتال منتقل کیا گیا، جہاں زخموں کی تاب نہ لاتے ہوئے وہ بھی چل بسی۔ جاں بحق ہونے والی دونوں لڑکیوں کا تعلق آزاد کشمیر کے علاقے راولاکوٹ سے ہے جو آپس میں رشتہ دار تھیں۔ دونوں کی میتیں ضروری کاروائی کے بعد راولپنڈی سے راولاکوٹ روانہ کردی گئی ہیں۔ ادھر ٹریفک پولیس کے مطابق سیف سٹی کیمروں کی مدد سے متعلقہ گاڑی کا سراغ لگالیا گیا ہے۔ پولیس کے مطابق گاڑی کے مالک کی تفصیلات حاصل کرلی گئی ہیں اور اس کے خلاف قانونی کاروائی جاری ہے۔ دوسری جانب ورثا نے بھی قانونی کاروائی کے لئے تھانہ نیوٹان میں تحریری درخواست جمع کرادی ہے۔
