سابق صدارتی مشیر پر خود کش حملہ میں افغان طالبان انٹیلی جنس ملوث نکلی

تہران، دی ہیگ(نیوز ایجنسیاں )ایرانی میڈیا نے دعویٰ کیا ہے کہ سابق افغان عہدیدار پرقاتلانہ حملے میں افغان طالبان انٹیلی جنس کے ملوث ہونے کے شواہد سامنے آگئے۔معروف ایرانی جریدے ایراف کے مطابق ایران کے شہر مشہد میں سابق افغان صدارتی مشیراحمد خان غوری پر حملہ کرنے والا دہشت گرد طالبان انٹیلی جنس کا ایجنٹ نکلا۔ یکم نومبر کو احمد خان غوری کو نشانہ بنانے والے خودکش بمبار کو کابل سے براہ راست احکامات موصول ہوئے تھے۔ طالبان انٹیلی جنس کے ایجنٹ نے بطور مہمان رسائی حاصل کرکے سابق افغان صدارتی مشیر کی رہائش گاہ میں دھماکہ کیا تھا۔اس سے قبل بھی طالبان سرحد پار دہشت گردی کے ذریعے ایران میں موجود سیاستدان معروف غلامی اورسابق افغان جنرل اکرم الدین سری کو نشانہ بن چکے ہیں۔ادھر عالمی فوجداری عدالت (آئی سی سی) نے افغانستان میں امریکی فوجیوں اور امریکی خفیہ اداروں کے اہلکاروں پر مبینہ جنگی جرائم کے الزامات سے متعلق اپنی پرانی تحقیقات کا ریکارڈ باضابطہ طور پر بند کرنے کا حکم دے دیا ۔عدالت نے فیصلہ کیا ہے کہ اب افغانستان میں 2021 کے بعد طالبان کی جانب سے مبینہ جرائم کی تحقیقات پر توجہ مرکوز کی جائے گی۔امریکی و برطانوی خبر رساں اداروں کے مطابق دی ہیگ میں قائم عالمی فوجداری عدالت کے ججوں کے مطابق استغاثہ یہ ثابت کرنے میں ناکام رہا کہ وہ طالبان سے متعلق الگ تحقیقات کے علاوہ افغانستان میں دیگر مبینہ جرائم کی مزید موثر تفتیش اور قانونی کارروائی کرسکتا ہے۔عدالت نے اپنے فیصلے میں تحقیقات کے لئے درکار شواہد حاصل کرنے اور تفتیشی سرگرمیاں جاری رکھنے میں قانونی اور عملی مشکلات کا حوالہ دیا۔
خودکش بمبار