کمسن ملازمہ نورفاطمہ پر تشدد کے واقعہ میں ملوث مرکزی ملزمہ گرفتار

لاہور (کرائم رپورٹر) نشتر کالونی کے علاقے میں کمسن گھریلو ملازمہ نور فاطمہ پر مبینہ تشدد کے
مقدمے میں پولیس نے مرکزی ملزمہ کو گرفتار کر لیا۔ پولیس کے مطابق 14 سالہ نور فاطمہ کی والدہ کی درخواست پر تھانہ نشتر کالونی میں مالک مکان فرزانہ اور ثانیہ کے خلاف مقدمہ درج کیا گیا۔ مدعیہ نے الزام عائد کیا کہ اس کی بیٹی کو تشدد کا نشانہ بنایا گیا اور اس کے گلے پر چھری چلانے کی کوشش بھی کی گئی۔ پولیس نے مرکزی ملزمہ کو گرفتار کرکے تفتیش کا آغاز کر دیا۔ پولیس ذرائع کا کہنا ہے کہ اس سے قبل فرزانہ کی مدعیت میں نور فاطمہ اور اس کی والدہ کے خلاف چوری کا مقدمہ درج کیا گیا تھا جس میں 48 ہزار روپے نقدی،5.33 تولے سونا اور 14 سوٹ چوری ہونے کا الزام عائد کیا گیا تھا۔ اس حوالے سے ترجمان ڈی آئی جی آپریشنز کا کہنا ہے کہ دونوں واقعات کے تمام پہلوئوں کا جائزہ لیا جارہا ہے جبکہ چوری اور تشدد کے الزامات کی تفتیش انوسٹی گیشن ونگ کے سپرد کر دی گئی ہے کسی دبائو یا اثرورسوخ کے بغیر شواہد کی بنیاد پر میرٹ پر کارروائی یقینی بنائی جائے گی۔