چونیاں میں سرکاری سکول بھی چوروں کے نشانے پر’دوبارہ واردات

چونیاں (این این آئی) سرکاری سکول بھی چوروں کے نشانے پر آگئے’ دو روز بعد دوبارہ چوری کی واردات ہوئی ہے۔ تفصیلات کے مطابق تھانہ سٹی چونیاں کی حدود میں سرکاری عمارتیں بھی محفوظ نہ رہ سکیں،گورنمنٹ پرائمری سکول سے نامعلوم چور پنکھے، بجلی کی تاریں اور دیگر سامان چوری کرکے لے گئے۔ اطلاع ملنے پر 15 پر کال کے بعد پولیس موقع پر پہنچ گئی اور ضروری کارروائی میں مصروف ہے۔ سکول ٹیچر کے مطابق دو روز قبل بھی سکول میں چوری کی واردات ہوئی تھی جبکہ تیسرے روز دوبارہ چور سکول میں داخل ہو کر پنکھے اور بجلی کی تاریں اتار کر لے گئے۔ سکول ٹیچر نے افسوس کا اظہار کرتے ہوئے کہا کہ اس چوری سے کسی فرد کا نہیں بلکہ معصوم بچوں کی تعلیم کا نقصان ہو رہا ہے۔ متعلقہ افسران کو اس واقعے کا فوری نوٹس لینا چاہیے۔ دوسری جانب شہریوں نے ڈی آئی جی شیخوپورہ رینج اور ڈی پی او قصور سے مطالبہ کیا ہے کہ واقعے کا فوری نوٹس لیتے ہوئے ملزمان کو گرفتار کیا جائے، چوری شدہ سامان برآمد کروایا جائے اور سرکاری تعلیمی اداروں کی سکیورٹی یقینی بنائی جائے۔