پیرو کے پہاڑی علاقے میں قدیم انکا تہذیب کے دور کی نادر مذہبی عبادت گاہ اور پتھر کے مجسمے دریافت

لیما (این این آئی) پیرو کے بلند و بالا پہاڑی سلسلے اینڈیز میں سائنسی کھدائی کے دوران ماہرینِ آثارِ قدیمہ نے صدیوں پرانی انکا تہذیب کے دور کی ایک نادر عبادت گاہ اور پتھر کے قیمتی مجسمے دریافت کر لیے۔ غیر ملکی میڈیا کے مطابق وزارتِ ثقافت کے حکام نے بتایا کہ یہ تاریخی مقام سطح سمندر سے تین ہزار میٹر سے زائد بلندی پر واقع ہے اور صدیوں سے گھنے جنگلات اور مٹی تلے چھپا ہوا تھا۔ حکام کے مطابق کھدائی کے دوران پتھر کی بنی ہوئی قربان گاہیں، قدیم مٹی کے برتن اور فلکیاتی مشاہدات کے لیے استعمال ہونے والے نشانات بھی ملے جو اس قدیم تہذیب کے سائنسی اور مذہبی عقائد کی عکاسی کرتے ہیں۔ ماہرین نے اس علاقے کو محفوظ قرار دے کر مزید تحقیق کا آغاز کر دیا ہے تاکہ اس تہذیب کے زوال اور طرزِ زندگی کے پوشیدہ پہلوئوں کو سامنے لایا جا سکے۔