وفاقی وزیر برائے آبی وسائل کا تربیلا 5 ویں توسیعی منصوبے کا دورہ

لاہور (پ ر) وفاقی وزیر برائے آبی وسائل میاں محمد معین وٹو نے تربیلا پانچویں توسیعی پن بجلی منصوبے کا دورہ کیا اور9 نومبر کو اِن ٹیک (Intake) پر پیش آنے والے واقعہ کے بعد کی صورتحال اور جاری کام کا جائزہ لیا۔ اس موقع پر
ایڈیشنل سیکرٹری وزارتِ آبی وسائل سید محمد مہر علی شاہ اور چیئرمین ارسا شفقت حسین ودھو بھی ان کے ہمراہ تھے۔ ممبر (واٹر) واپڈا انجینئر عاصم رف خان، واپڈا کے سینئر آفیسرز اور کنٹریکٹر کے نمائندے بھی اس موقع پر موجود تھے۔ دورے کے دوران وفاقی وزیر نے اِن ٹیک سٹرکچر اور منصوبے کے دیگر اہم حصوں کا معائنہ کیا۔ انہوں نے سائٹ پر جاری کام کا جائزہ لیا اور پراجیکٹ حکام سے جاری اقدامات کی رفتار اور معیار کے بارے میں بریفنگ لی۔ وفاقی وزیر کو بتایا گیا کہ فوری نوعیت کے اقدامات کے تعین کے بعد سائٹ پر بحالی کے کام تیزی سے جاری ہیں۔ جاری کاموں کا مقصد متاثرہ حصہ کو مضبوط بنانا، صورتحال سے منظم انداز میں نمٹنا اور مستقبل میں ایسے واقعات کی دوبارہ روک تھام کے لیے قلیل، وسط اور طویل مدتی حفاظتی اقدامات کرنا ہے۔ وفاقی وزیر نے ہدایت کی کہ بحالی کے کام مکمل احتیاط، کڑی نگرانی اور موثر رابطہ کے ساتھ آگے بڑھائے جائیں۔ کنسلٹنٹس، کنٹریکٹر اور واپڈا کی جانب سے وفاقی وزیر کو بتایا گیا کہ موجودہ صورتحال میں تربیلا ڈیم اور اس کے دیگر سٹرکچر کو کوئی خطرہ نہیں ہے۔ وفاقی وزیر نے پراجیکٹ حکام کو منصوبے پر مسلسل نگرانی برقرار رکھنے کی ہدایت کی۔ وفاقی وزیر نے کنسلٹنٹس، کنٹریکٹر اور واپڈا کی پراجیکٹ ٹیم کو بحالی کے کاموں کی رفتار مزید تیز کرنے اور منصوبے کی تکمیل میں تاخیر کو محدود رکھنے کے لیے ہنگامی لائحہ عمل تیار کرنے کی بھی ہدایت کی۔ انہوں نے مزید ہدایت کی کہ پراجیکٹ پر حفاظت اور معیار کو یقینی بنایا جائے۔ تربیلا پانچواں توسیعی پن بجلی منصوبہ تربیلا ڈیم کی ٹنل نمبر 5 پر زیرِ تعمیر ہے، جس کی مجموعی پیداواری صلاحیت ایک ہزار 530میگاواٹ ہے۔