پٹرولیم قیمتوں میں کمی،کراچی گڈز کیریئر ایسوسی ایشن کا کرایوں میں 5 فیصد کمی

کراچی (آئی این پی) کراچی گڈز کیریئر ایسوسی ایشن نے کرایوں میں5 فیصد کمی کا اعلان کیا ہے۔ صدر گڈز کیریئر ایسوسی ایشن رانا محمد اسلم نے حکومت کی جانب سے پٹرولیم مصنوعات کی قیمتوں میں کمی خوش آئند قرار دی، اور کہا کہ پٹرولیم مصنوعات سستی ہونے کا فائدہ عوام کو پہنچائیں گے۔ اپنے بیان میں رانا محمد اسلم نے کہا وزیر اعظم شہباز شریف اور وفاقی وزیر پٹرولیم کے اقدامات قابلِ ستائش ہیں۔ انہوں نے مطالبہ کیا کہ ٹول ٹیکسوں میں بھی کمی کی جائے اور ود ہولڈنگ ٹیکس میں کمی کے ذریعے ٹرانسپورٹ سیکٹر کو ریلیف دیا جائے۔ واضح رہے کہ آئل اینڈ گیس ریگولیٹری اتھارٹی (اوگرا) کی جانب سے جاری کردہ نوٹیفکیشن کے مطابق پٹرول کی قیمت میں2 روپے فی لیٹر کمی کی گئی ہے جس کے بعد نئی قیمت 330 روپے فی لیٹر مقرر ہو گئی ہے۔ نوٹیفکیشن کے مطابق ڈیزل کے نرخ 360 روپے پر برقرار رکھے گئے ہیں۔ پٹرولیم مصنوعات کی قیمتوں کا اطلاق گزشتہ رات 12 بجے سے ہو گیا ہے جبکہ یہ قیمتیں 3 روز برقرار رہیں گی۔